«Հյուսիսային պողոտայի» գործով լսումների ձայնագրություններն ուղարկելու եմ իրավապահներին․ ԱԺ նախագահ. ՏԵՍԱՆՅՈՒԹ

Իրավական պետություն կառուցելու մեր ջանքերը թերի կլինին, եթե չանդրադառնանք գերակա շահի անվան տակ իրականացված քաղաքացիների ունեզրկման գործընթացին: Այս մասին ԱԺ-ում «Պետության կողմից «Հյուսիսային պողոտա-Կասկադ» ծրագրով բացառիկ գերակա հանրային շահ ճանաչելու հետևանքով սեփականության իրավունքի ոտնահարման խնդիրները» թեմայով լուսմների ժամանակ ասաց խորհրդարանի նախագահ Արարատ Միրզոյանը:
Արարատ Միրզոյանը նշեց, որ խնդրին ծանոթ է վաղուց, և իր մասնակցությունն է ունեցել Արամի ու Բյուզանդի փողոցների համար կազմակերպված զանազան միջոցառումներին:

«Իրավական պետություն կառուցելուն ուղղված մեր ջանքերը թերի կլինեն, եթե մենք չանդրադառնանք ժամանակին գերակա հանրային շահի անվան տակ տեղի ունեցած քաղաքացիների ունեզրկման գործընթացին և սեփականության իրավունքի զանգվածային խախտումներին»,- ասաց Արարատ Միրզոյանը:

Խնդիրը, ըստ ԱԺ նախագահի, բազմաշերտ է և տարբեր հարթություններում է: «Բազմաթիվ դիտարկումների համաձայն՝ այդ գործընթացներում դրսևորվել են գործադիր իշխանության տարբեր օղակների բարձրաստիճան պաշտոնյաների ինքնիրավչությունն ու կամայականությունը, գուցե նաև սեփական բիզնեսի և ֆինանսական շահերը: Խոսքը գնում է կոռուպցիոն բացահայտումների մասինե,-նշեց խորհրդարանի ղեկավարը և տեղեկացրեց, որ անցումային արդարադատության շրջանակում պետք է անպայման անդրադառնալ այս խնդիրներին, վերաքննել դրանք և փաստերի հաստատման դեպքում գտնել և պատժել մեղավորներին:

«Բացի գործադիր իշխանության տարբեր անձանց շահերից ու մասնակցությունից՝ դրսևորվել է նաև դատական իշխանության կատարյալ կախվածություն գործադիր իշխանության շահագրգիռ ներկայացուցիչներից, և դրա վկայությունն էլ, թերևս, այն է, որ բազմաթիվ կայացված վճիռներ այսօր հակառակ ավարտն են ունենում ՄԻԵԴ -ում», -ասաց Արարատ Միրզոյանը:

Խորհրդարանի ղեկավարի խոսքով՝ ամենակարևորը տուժողների իրավունքների վերականգնումն է:

«Այս վերաքննության արդյունքում, փաստերի հաստատման դեպքում, մենք պետք է գործնական քայլեր ձեռնարկենք տուժողների իրավունքների վերականգնման ուղղությամբ: Այսօրվա ելույթներում նշվեցին հանգամանքներ, որոնք արժանի են իրավապահ մարմինների ուշադրությանը, և այս ելույթների ձայնագրությունն ուղարկելու եմ իրավապահ մարմիններին, որտեղ կորոշեն՝ որն է հիմք, փաստ՝ գործողություններ ձեռնարկելու համար: Մենք՝ որպես քաղաքական թիմ, մեր իշխանությունը բացարձակապես որևէ կաշկանդվածություն չունի նշածս ուղղություններով աշխատանքները շարունակելու առումով և դրա վկայությունն են նախ՝ այս լսումները, ապա նաև փաստահավաք խմբի առկայությունն Արդարադատության նախարարության կողմից կազմված ռազմավարության մեջ»,-եզրափակեց Ազգային ժողովի նախագահը:

Մանրամասները՝ տեսանյութում:

Նարեկ Կիրակոսյան