Տնտեսություն
04.10.2019 | 11:59«Սանիթեքի» հետ պայմանագիրը խզելու ամենաճիշտ ժամանակը հենց երեկ էր։ Կարծում եմ՝ քաղաքապետն աղբահանության խնդրի լուծման իդեալական տարբերակն է ընտրել։ Այս մասին այսօր՝ «Երևանը հրաժարվում է Սանիթեքից․ աղբահանության նոր մոդելը» թեմայով քննարկման ընթացքում նշեց Երևանի ավագանու «Իմ քայլը» խմբակցության անդամ Արմեն Գալջյանը։
Անդրադառնալով «Սանիթեքի»՝ արբիտրաժային դատարան դիմելու հնարավոր գործընթացին, ավագանու անդամը նկատեց․ «Կարծում եմ՝ ճիշտ չի լինի այս թեմայով որոշակի ենթադրություններ անել, որովհետև արբիտրաժային դատարանն այն ատյանն է, որտեղ հնարավոր չէ կանխորոշել ելքերը։ «Սանիթեքը» թե՛ իրավական, թե՛ տրամաբանական, թե՛ ֆինանսական հիմք չունի արբիտրաժային դատարան դիմելու, քանի որ եթե չի կարողանում ներդրումներ իրականացնել և խնդիրը կարգավորել, ինչպե՞ս է պատրաստվում մի քանի միլիոն դոլար ծախսել՝ արբիտրաժային դտարան դիմելու համար։ Այնտեղի ծախսերը և փաստաբանական ծախսերը շատ մեծ են»։
Խոսելով աղբահանության նոր մոդելի մասին, Արմեն Գալջյանը նշեց, որ առնվազն մինչև դեկտեմբեր կսպասեն՝ տեսնելու համար, թե ինչ արդյունքներ է գրանցում աղբահանության համայնքային հիմնարկը։
«Պետք է տեսնենք՝ համայնքն ինչպես է կառավարում, որովհետև մասնավորինն արդեն տեսել ենք։ Կարծում եմ՝ Երևան քաղաքն արդեն լինելու է ավելի մաքուր, քան երբևէ »:
Մանրամասները՝ տեսանյութում։
Նելլի Մելքոնյան
