Հովհաննես Թամամյանին մեղադրանք առաջադրելու լուրը ՀՔԾ-ում չեն հերքում, բայց և չեն մեկնաբանում

ՀՀ ոստիկանության քրեական հետախուզության գլխավոր վարչության պետի նախկին տեղակալ Հովհաննես Թամամյանին հարցաքննության հրավիրելու և վերջինին մեղադրանք առաջադրելու մասին՝ մամուլում հրապարակված լուրը Հատուկ քննչական ծառայությունից չեն հերքում, բայց և չեն մեկնաբանում:

«Լուրը չենք մեկնաբանում»,- Factor.am-ի հետ զրույցում ասաց ՀՔԾ խոսնակ Մարինա Օհանջանյանը:

Ավելի վաղ Armlur.am-ը գրել էր, որ ՀՔԾ-ն Մարտի 1-ի գործով նախաքննական մարմին է հրավիրել ՀՀ ոստիկանության քրեական հետախուզության գլխավոր վարչության պետի նախկին տեղակալ Հովհաննես Թամամյանին, վերջինին մեղադրանք է առաջադրվել:

Հիշեցնենք. որ ՀՔԾ-ն սեպտեմբերի 25-ին մեղադրանք է առաջադրել ՀՀ նախկին ոստիկանապետ Ալիկ Սարգսյանին ՀՀ քրեական օրենսգրքի 308-րդ հոդվածի 2-րդ մասով, 314-րդ հոդվածի 1-ին և 334-րդ հոդվածի 1-ին մասերով:

Ըստ մեղադրանքի՝ 2008 թվականի մարտի 1-ի դրությամբ ՀՀ ոստիկանության պետ Հայկ Հարությունյանը, ոստիկանության պետի տեղակալ Ալեքսանդր Աֆյանը, ինչպես նաև ՀՀ ոստիկանության քրեական հետախուզության գլխավոր վարչության պետ Հայկ Միլիտոնյանը, վերջինիս տեղակալ Հովհաննես Թամամյանը և ոստիկանության զորքերի մի խումբ ծառայողներ հետին ամսաթվով ստորագրել են կեղծ տեղեկություններ և գրառումներ պարունակող պաշտոնական փաստաթղթեր, որոնք տրամադրել են ՀՀ Ազգային ժողովի կողմից 2008թ. հունիսի 16-ի որոշմամբ ստեղծված Մարտի 1-ին և 2-ին Երևան քաղաքում տեղի ունեցած իրադարձություններն ուսումնասիրող ՀՀ ԱԺ ժամանակավոր հանձնաժողովին, ՀՀ նախագահ Սերժ Սարգսյանի կարգադրությամբ ստեղծված Փորձագետների փաստահավաք խմբին և հիշյալ դեպքի առթիվ հարուցված քրեական գործով վարույթն իրականացնող մարմնին և նրանց հայտնել են իրականությանը չհամապատասխանող տեղեկություններ, իսկ քրեական գործով վարույթն իրականացնող մարմնին տվել են ներկայացված փաստաթղթերի բովանդակությանը համահունչ սուտ ցուցմունքներ: