08.11.2026 | 00:09
Կրակոցներ Կրակովի կենտրոնում․ զոհերի թիվը հասել է 6-ի, կա 15 վիրավոր
Թրամփի իմփիչմենթի գործընթացը շարունակվում է. նոր մանրամասներ. VOA
Քաղաքականություն
02.10.2019 | 22:28
ԱՄՆ պետքարտուղար Մայք Պոմպեոն հայտարարել էր, որ տեղյակ չէ գաղտնի զեկույցի մասին, ըստ որի՝ նախագահ Դոնալդ Թրամփը 2020 թվականի ընտրություններին օտարերկրյա միջամտություն է հրահրել՝ խնդրելով Ուկրաինային հետաքննել Դեմոկրատական կուսակցության նախագահական թեկնածու Ջո Բայդենին և նրա որդի Հանթերին: Այս մասին գրում է «Ամերիկայի ձայնը»:
Աղբյուրի փոխանցմամբ՝ ստանալով Կոնգրեսի ստորին պալատից ցուցմունք տալու պահանջ՝ Պոմպեոն նամակով պատասխանել է, որ նման պահանջները «կարող են դիտարկվել միայն որպես աշխատակիցներին վախեցնելու և սպառնալու փորձ»:
«Ինչ վերաբերում է հեռախոսազրույցին, այո՛, ես ներկա եմ գտնվել: Զրույցն ընթանում էր Ուկրաինայի վերաբերյալ ամերիկյան քաղաքականության համատեքստում: Խոսքը գնում էր նոր կառավարությանը կոռուպցիայից ազատվելու և Ուկրաինային ամուր տնտեսություն կառուցելու աջակցության մասին»,- ասել է Պոմպեոն:
Պետքարտուղարության գլխավոր տեսուչը չորեքշաբթի Կոնգրեսի երկու պալատների աշխատակիցների հետ հանդիպման ընթացքում նախատեսում է անդրադառնալ փաստաթղթերին, որոնք կոնգրեսականները պահանջել են իրենց հետաքննության համար: Ներկայացուցիչների պալատի անվտանգության և արտաքին հարաբերությունների հանձնաժողովը պահանջել է նաև ցուցմունք տալ կոնգրեսականների առջև Ուկրաինայում ԱՄՆ-ի նախկին դեսպան Մերի Յովանովիչին և Ուկրաինայի հարցերով նախկին հատուկ հանձնակատար Քըրթ Ուոքերին:
Նախագահ Թրամփը իր դեմ իմփիչմենթի գործընթացն անվանում է «հեղաշրջում» և հայտարարում, որ որևէ սխալ չի գործել Ուկրաինայի նախագահի հետ զրույցում:
