29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Տրդատ Սարգսյանը կհարցաքննվի, երբ նախաքննական մարմինը նպատակահարմար գտնի. ՔԿ խոսնակ
Հասարակություն
02.10.2019 | 15:18
Եղեգնաձորում փոխգնդապետ Արա Մխիթարյանին դաժան ծեծի ենթարկելու դեպքով հարուցված գործի շրջանակում Վայոց ձորի մարզպետ Տրդատ Սարգսյանն այս պահին չի հարցաքննվել։ Լրագրողների հետ զրույցում այս մասին ասաց ՀՀ Քննչական կոմիտեի մամուլի խոսնակ Նաիրա Հարությունյանը։
«Երբ նախաքննական մարմինը գտնի նպատակահարմար, անհրաժեշտությունը կգտնի, այդ ժամանակ էլ մարզպետը կհարցաքննվի»,- նշեց նա։
Հարցին՝ Տրդատ Սարգսյանն այսօր չպե՞տք է հարցաքննվեր՝ Նաիրա Հարությունյանը պատասխանեց. «Այս պահին նախաքննական մարմինն ունի պլանավորած քննչական գործողություններ, որ պիտի իրականացնի: Տեղի կունենա այսօր թե վաղը, հստակ չեմ կարող նշել»։
«Վայոց ձորում տեղի ունեցած միջադեպի առիթով հարուցված քրեական գործն այս պահին նախաքննության փուլում է: Նախաքննական մարմինը ձեռնարկում է բոլոր քննչական, դատավարական, օպերատիվ-հետախուզական միջոցառումներ՝ դեպքի բոլոր հանգամանքները պարզելու, դեպքին մասնակից բոլոր անձանց շրջանակը հստակեցնելու համար»,- հավելեց ՔԿ խոսնակը:
Ավելի վաղ ՀՀ Քննչական կոմիտեն հայտնել էր, որ Եղեգնաձորում փոխգնդապետ Արա Մխիթարյանին դաժան ծեծի ենթարկելու միջադեպին մարզպետ Տրդատ Սարգսյանի մասնակցությունը ստուգելու նպատակով առգրավվել են միջադեպի հարակից տարածքի տեսախցիկները:
Հիշեցնենք նաև, որ սեպտեմբերի 17-ին Եղեգնաձորի շենքերից մեկի բակում վիճաբանության ընթացքում Եղեգնաձոր քաղաքի 28-ամյա բնակիչն ու նրան օգնության հասած 3-4 անձինք ծեծի են ենթարկել փոխգնդապետ Արա Մխիթարյանին: Նա տեղափոխվել է ՊՆ կենտրոնական կլինիկական հոսպիտալ, վիճակը գնահատվում է ծայրահեղ ծանր:
