«Բոլորը գիտեն՝ Քոչարյանը կալանքի տակ ուրիշ է, դրսում՝ ուրիշ»․ Արամ Մանուկյան. ՏԵՍԱՆՅՈՒԹ

Մարտի 1-ի գործով ոչ մի վկա կասկածահարույց անձանցից ապահովագրված չէ։ Այս մասին այսօր՝ «Մարտի 1-ի գործով վկաների անվտանգության խնդիրները. պաշտպանվա՞ծ են արդյոք նրանք» թեմայով քննարկման ընթացքում նշեց «Հայ ազգային կոնգրես» կուսակցության փոխնախագահ Արամ Մանուկյանը։

Նրա խոսքով՝ Մարտի 1-ի գործով վկաների համար առանցքային նշանակություն ունի երկրորդ նախագահ Ռոբերտ Քոչարյանի՝ կալանքի տակ գտնվել-չգտնվելը։

Երկրորդ նախագահը, «Հայ ազգային կոնգրես» կուսակցության փոխնախագահի կարծիքով՝ կալանքի տակ ուրիշ է, դրսում՝ ուրիշ, և դա բոլորին է հայտնի։ «Հայկ Հարությունյանի հետ կատարված դեպքը հիմնավորում է այն կասկածը, որ Ռոբերտ Քոչարյանը դրսում ուղղակի չի կարող լինել։ Դրսում նա կարող է լինել ազդեցիկ՝ ունենալով Հայաստանի ժողովրդից գողացված մի քանի միլիարդ դոլար գումար։ Այդ առումով իսկապես խիստ անհրաժեշտ է բոլոր վկաների անվտանգությունն ապահովել, և պետությունը պարտավոր է իր այս ֆունկցիան լրջագույնս կատարել․ գոնե շատ տեղեկատվություն ունեցող առանցքային վկաների մասին է խոսքը»։

Ըստ նրա՝ խնդիրը ոչ միայն վկաների պաշտպանության մեջ է, այլ այնպիսի մթնոլորտի ստեղծման, որտեղ օրենքի խախտումը բացառված է։ «Ով ուզում է լինի։ Մարտի 1-ի գործի քննությունն այնքան հնչեղ, այնքան կարևոր, ճակատագրական ու պատմական է, որ իշխանությունները պետք է լրջագույն գործողություն ծավալեն, լրջագույն քայլեր անեն՝ այդ ազատ, արդար դատավարական գործընթացն ապահովելու համար»,- եզրափակեց Արամ Մանուկյանը։

Մանրամասները՝ տեսանյութում։

Նելլի Մելքոնյան