18.10.2026 | 16:10
Որակյալ կերերից մինչև մաքրացեղ խոզեր․ «Օջախ Ագրո»-ի առաջարկները․ ՏԵՍԱՆՅՈւԹ
Փաշինյանը դիմավորեց Իրանի նախագահին և Սինգապուրի վարչապետին
Քաղաքականություն
01.10.2019 | 16:11
Քիչ առաջ Բաղրամյան 26 ժամանեցին Իրանի Իսլամական Հանրապետության նախագահ Հասան Ռոհանին և Սինգապուրի վարչապետ Լի Սյեն Լուն, որոնք ԵՏՄ բարձրագույն տնտեսական խորհրդի նիստում հրավիրյալ երկրների կարգավիճակ ունեն։
Բարձրաստիճան հյուրերին դիմավորեց ՀՀ վարչապետ Նիկոլ Փաշինյանը։ Նախատեսված է, որ ԵՏՄ պետությունների ղեկավարների կազմով նիստին հաջորդելու է ընդլայնված նիստը, որին մասնակցելու են թե՛ Իրանի նախագահը, թե՛ Սինգապուրի վարչապետը։
Քննարկման առարկա կդառնա ԵՏՄ-ի 2018 թվականի բյուջեի կատարողականը, ինչպես նաև միության 2020 թվականի բյուջեն։ Երկրների առաջնորդները կանդրադառնան միջազգային գործակցության հիմնական ուղղություններին, որոնք հաջորդ տարի լինելու են առաջնահերթ, կքննարկվեն ընդհանուր ֆինանսական շուկայի ձևավորման կոնցեպցիան, ԵՏՄ անդամ-երկրների միջև գազի տարանցմանը և այլ փոխադրումներին առնչվող օրենսդրությունների ներդաշնակեցման հարցերը։
Այսօր նաև որոշում կկայացվի, թե Եվրասիական տնտեսական միության բարձրագույն տնտեսական խորհրդի հաջորդ նիստը երբ և որտեղ է կայանալու։
Հիշեցնենք, որ հոկտեմբերից ուժի մեջ է մտնում ԵՏՄ-ի և Իրանի միջև ազատ առևտրի մասին համաձայնագիրը։ Նույնպիսի պայմանագիր ստորագրվելու է նաև Սինգապուրի հետ։
