12.10.2026 | 23:18
Գազամատակարարման դադարեցումներ՝ Հայաստանի մի շարք հասցեներում
Հայաստանում ֆրանսիական դպրոցը պետք է լինի 100%-ով հայկական և 100%-ով՝ ֆրանսիական. դեսպանը՝ նախարարին
Հասարակություն
01.10.2019 | 15:48
ՀՀ կրթության, գիտության, մշակույթի և սպորտի նախարարությունից տեղեկացնում են, որ նախարար Արայիկ Հարությունյանն այսօր ընդունել է ՀՀ-ում Ֆրանսիայի արտակարգ և լիազոր դեսպան Ժոնաթան Լաքոտին։
Հանդիպման սկզբում նախարար Արայիկ Հարությունյանը ցավակցություն է հայտնել նախագահ Ժակ Շիրակի մահվան կապակցությամբ՝ ընդգծելով, որ նրա կառավարման օրոք հայ-ֆրանսիական հարաբերություններն աննախադեպ վերելք են ապրել։
Դեսպան Ժոնաթան Լաքոթն իր խոսքում կարևորել է Հայաստանում ֆրանսիական դպրոցի դերը՝ փոքր-ինչ ձևափոխելով Շառլ Ազնավուրի հայտնի արտահայտություններից մեկը և նշելով, որ դպրոցը պետք է լինի 100%-ով հայկական և 100%-ով՝ ֆրանսիական։
Հանդիպման ընթացքում կողմերը քննարկել են Հայաստանում ֆրանսիական համալսարանի զարգացման և այնտեղ նոր ծրագրերի իրականացման հարցը, ինչպես նաև «ԵՄ-ն՝ նորարարությունների համար» ծրագրի շրջանակում ԹՈՒՄՈ-ի ծրագրի և Ֆրանսիական համալսարանի միջև համագործակցության ուղղությունները։ Հիշեցնենք, որ այդ ծրագրի նպատակը բարձրագույն կրթության համար ԹՈՒՄՈ կենտրոնի ստեղծումն է, որի ենթակառուցվածքներն օգտագործվելու են տարբեր բուհերի ուսանողների կողմից իրենց գիտական և փորձարարական ծրագրերի իրականացման նպատակով։
Նախարարն ու դեսպանը քննարկել են նաև նախարարի՝ առաջիկայում սպասվող այցը Փարիզ և այնտեղ նախատեսվող հանդիպումների օրակարգը։
