Շրջակա միջավայրի նախարար Էրիկ Գրիգորյանի դեմ ներկայացված հայցադիմումը լրացվել է․ Նազելի Վարդանյան

Ջերմուկ համայնքի 19 բնակիչ, փաստաբան Նազելի Վարդանյանի միջոցով, նոր երևան եկած էկոլոգիական հանգամանքներով հայցադիմում է ներկայացրել ՀՀ վարչական դատարան շրջակա միջավայրի նախարար Էրիկ Գրիգորյանի դեմ՝ պահանջելով ուժը կորցրած ճանաչել Ամուլսարի հանքավայրի հանքարդյունահանման համալիրի փոփոխված նախագծի՝ շրջակա միջավայրի վրա ազդեցության պետական փորձաքննական հ. ԲՓ 35 եզրակացությունը և ՀՀ բնապահպանության նախարարի 29.04.2016թ. հաստատումը:

Փաստաբան Նազելի Վարդանյանը Factor.am-ի հետ զրույցում նշեց, որ այսօրվա դատական նիստին ներկայացրել է նոր լրացումներ:

«Դատարան ներկայացրած մեր հայցադիմումը լրացրել ենք նոր հանգամանքներով։ Մեր ներկայացրած հայցադիմումում ներկայացված էր երեք գործոն. առաջինը՝ Հարություն Բրոնեզյանի հրավիրած փորձագետների եզրակացությունը՝ թթվային դրենաժի վերաբերյալ, երկրորդը՝ «Վայրի բնության միջազգային հիմնադրամի» եզրակացությունը՝ Կարմիր գրքում գրանցված կենդանիների և բույսերի վերաբերյալ, երրորդը՝  ֆինանսական կորպորացիայի եզրակացությունն է։ Այս երեք հանգամանքները մենք լրացրել ենք նոր փոփոխություններով՝ դա «Էլարդի» ուսումնասիրությունն է, որտեղ նշված են այն հանգամանքները, որոնք փորձաքննություն չեն անցել, Շրջակա միջավայրի նախարարի գրությունն է՝ բաղկացած 13 կետից և բնապահպանության և ընդերքի տեսչական մարմնի կայացրած որոշումն է, որով արգելված է գործունեություն իրականացնել Կարմիր գրքի տեսակների վրա։ Այս երեք հանգամանքները ավելացան մեր ներկայացրած հայցին»,- ասաց  Վարդանյանը:

Ըստ փաստաբանի՝ պատասխանող կողմը ժամանակ է խնդրել՝ այս նոր հանգամանքներին ծանոթանալու համար, դատարանը բավարարել է խնդրանքը: Հաջորդ դատական նիստը նշանակվել է հոկտեմբերի 17-ին ժամը 14։30-ին:

Աղավնի Սուքիասյան