18.10.2026 | 16:10
Որակյալ կերերից մինչև մաքրացեղ խոզեր․ «Օջախ Ագրո»-ի առաջարկները․ ՏԵՍԱՆՅՈւԹ
Հնդկաստանում ջրհեղեղների և սողանքների հետևանքով զոհերի թիվը հասել է 127-ի
Քաղաքականություն
30.09.2019 | 12:47
Հնդկաստանի հյուսիսում անցած մեկ շաբաթվա ընթացքում հորդառատ անձրևների հետևանքով առաջացած ջրհեղեղների և սողանքների արդյունքում 127 մարդ է մահացել: Այս մասին գրում է ՌԻԱ Նովոստին՝ վկայակոչելով Asian Age-ը:
Ամենաշատ զոհերը՝ 87 մարդ, արձանագրվել են Ութար Փրադեշ նահանգում, 27 մարդ էլ մահացել է Բիհարում: Երկրի հյուսիսային մի շարք շրջաններում բոլոր ուսումնական և պետական հաստատությունները շարունակում են փակ մնալ, չեն գործում նաև տեղի խանութներն ու ռեստորանները:
Իրադրությունը բարդանում է նրանով, որ օդերևութաբանները միակարծիք չեն, թե առաջիկա օրերին ինչպիսին կլինի ցիկլոնը տարածաշրջանում: «Մեր օդերևութաբանական ծառայությունները, կարծես, անօգնական են, քանի որ նրանց կանխատեսումները հակասում են միմյանց»,- ասել է Բիհար նահանգի գլխավոր նախարար Նիտիշ Կումարը:
Ամեն դեպքում, առաջիկա օրերի օդերևութաբանական կանխատեսումները հուսադրող չեն. մասնագետները նախազգուշացնում են ուժեղ անձրևների մասին՝ քաղաքացիներին կոչ անելով մնալ տներում:
