12.11.2024 | 23:27
Գրետա Թունբերգը ժամանել է Հայաստան
Վրացական ընդդիմությունն ԱԳ նախարարին Լավրովի հետ հանդիպման համար խորհրդարան են կանչել
Քաղաքականություն
27.09.2019 | 14:30
Վրաստանի ընդդիմադիր «Միացյալ ազգային շարժում» խմբակցության պատգամավորները երկրի ԱԳ նախարար Դավիթ Զալկալիանիին խորհրդարան են կանչել՝ ՌԴ ԱԳ նախարար Սերգեյ Լավրովի հետ հանդիպման առիթով պարզաբանումներ տալու համար: Այս մասին Imedi հեռուստաալիքին ասել է խմբակցության ղեկավար Ռոման Գոցիրիձեն, գրում է ՏԱՍՍ-ը:
«Մեր խմբակցությունը նրան հանձնաժողովում լսումների է կանչել: Լավրովի հետ հանդիպումը ժողովրդի թիկունքում արված գործողություն էր: Հանդիպումից առաջ անհրաժեշտ էր խորհրդակցություններ անցկացնել քաղաքական ուժերի, հասարակության և խորհրդարանի հետ»,- ասել է Գոցիրիձեն:
Դավիթ Զալկալիանին իր հերթին հայտարարել է, որ պատգամավորների հետ շփվելու խնդիր չունի և, ամենայն հավանականությամբ, խորհրդարան կգնա հոկտեմբերին, և պատգամավորները հնարավորություն կունենան իրեն լսել «նախարարի ժամ» ձևաչափով:
Նշենք, որ հինգշաբթի Վրաստանի ԱԳ նախարարը հանդիպել է ՌԴ ԱԳ նախարար Սերգեյ Լավրովի հետ: Սա առաջին հանդիպումն էր 2008 թվականից ի վեր, երբ Ռուսաստանի կողմից Հարավային Օսիայի և Աբխազիայի անկախության ճանաչումից հետո Թբիլիսին խզեց դիվանագիտական հարաբերությունները Մոսկվայի հետ:
Դրանից հետո Վրաստանի և ՌԴ-ի պաշտոնատար անձինք շփվում էին միայն ՌԴ-ի հետ հարաբերությունների կարգավորման հարցերով վրաց վարչապետի հատուկ ներկայացուցիչ Զուրաբ Աբաշիձեի և ՌԴ ԱԳ փոխնախարարի մակարդակով:
Հավելենք, որ ԵԱՀԿ նախագահ Միրոսլավ Լայչակը դրական է գնահատել Նյու Յորքում ՄԱԿ-ի Գլխավոր վեհաժողովի շրջանակում Զալկալիանիի և Լավրովի հանդիպումը՝ նշելով, որ դա հույս է ներշնչում, որ կառուցողական երկխոսությունը կարող է նվազեցնել լարվածությունն ու ամրապնդել կայունությունը:
