02.07.2026 | 06:06
ԱԱ-2026. ԱՄՆ-ի հավաքականը շարժվում է առաջ. ՏԵՍԱՆՅՈՒԹ
Թափանցիկ և հաշվետու կառավարումն այլընտրանք չունի ինչպես հանրային, այնպես էլ մասնավոր հատվածում. Տիգրան Ավինյան. ՏԵՍԱՆՅՈՒԹ
Տնտեսություն
24.09.2019 | 14:18
Թափանցիկությունն ու հաշվետվողականությունը հանդիսանում են մեր կառավարության հիմնական գործելաոճը և ուղենիշը: «Միջազգային համապատասխանության և հակակոռուպցիոն համաժողով 2019»-ի ժամանակ ունեցած ելույթում այս մասին ասել է ՀՀ փոխվարչապետ Տիգրան Ավինյանը:
«Ակնհայտ է, որ թափանցիկ և հաշվետու կառավարումն այլընտրանք չունի ինչպես հանրային, այնպես էլ մասնավոր հատվածում: Բոլորովին վերջերս մեկնարկեց ՀՀ հանրային կառավարման բարեփոխումների իրականացման և դրանից բխող ռազմավարության մշակման գործընթացը, որը նպատակ ունի ամբողջությամբ վերանայելու կառավարման համակարգը: Այս գործընթացում մենք կարևորում ենք պետական քաղաքականության մշակման, հանրային ծառայությունների մատուցման, մարդկային ռեսուրսների կառավարման, հաշվետվողականության և բարեվարքության ապահովմանն ուղղված կառուցակարգերի ստեղծումը և դրանց կիրառումը»,- նշել է Ավինյանը:
Նա ընդգծել է, որ այդ գործընթացում կենսական նշանակություն ունի բոլոր շահագրգիռ կողմերի ջանքերի մեկտեղումը, ինչպես նաև երկրում տեղի ունեցող բարեփոխումներին քաղաքացիական հասարակության ու բիզնեսի անմիջական մասնակցությունը:
«Թեև առաջնայնորեն խոսվում է պետական համակարգում կոռուպցիայի և դրա դրսևորումների մասին, սակայն մասնավոր ոլորտը ևս գտնվում է բոլորիս ուշադրության կենտրոնում: Նշեմ, որ կառավարությունն իր ծրագրի միջոցով հանձն է առել տնտեսական գործունեության իրականացման համար ստեղծել հնարավորինս բարենպաստ պայմաններ: Ըստ այդմ, մենք հետևողական քայլեր ենք ձեռնարկում ձեռներեցության ու նորարարության խթանման, պետական կարգավորումների և հարկային ու մաքսային քաղաքականության առավելագույն պարզեցման, ներդրումային միջավայրի բարելավման ուղղությամբ: Մասնավորապես, թավշյա հեղափոխությունից հետո արմատախիլ է արվել համակարգային կոռուպցիան, ներդրումային խոշոր ծրագրերի մասով ներդրվում են պետություն-մասնավոր համագործակցության նոր կառուցակարգեր, կառավարությունը փուլային եղանակով թվայնացնում է քաղաքացիներին և բիզնեսին մատուցվող ծառայությունները՝ վարչական բեռը թեթևացնելու և կոռուպցիոն ռիսկերը վերացնելու նպատակով, մեծածավալ աշխատանքներ են տարվում հակամրցակցային ոլորտում»,- ասել է Ավինյանը:
Ըստ փոխվարչապետի՝ կոռուպցիայի դեմ պայքարում բիզնեսը խաղում է միաժամանակ պասիվ և ակտիվ դեր. «Պասիվ առումով բիզնեսը պարտավոր է ենթարկվել պետության սահմանած խաղի կանոններին և օրենքներին, սակայն կոռուպցիայի դեմ պայքարում բիզնեսի գործառույթները միայն պասիվ դերով չեն սահմանափակվում: Մասնավոր ընկերություններն իրենց հերթին պետք է ձեռնարկեն անհրաժեշտ քայլեր կոռուպցիայի դեմ պայքարի միջազգային և օրենսդրական չափանիշներին համապատասխանությունն ապահովելու համար, նախաձեռնողականություն դրսևորեն հակակոռուպցիոն ներքին ընթացակարգերի ներդրման հարցում: Այս համատեքստում կարևորում եմ նաև կոռուպցիայի կանխարգելումը և դրա դեմ արդյունավետ պայքարը՝ ընկերությունների իրական սեփականատերերի մասին տեղեկատվության բացահայտման ու հրապարակման միջոցով»:
Մանրամասները՝ տեսանյութում:
