14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Կրակել է որսորդական հրացանով. սպանության փորձը բացահայտվել է. ՏԵՍԱՆՅՈՒԹ
Հասարակություն
23.09.2019 | 16:24
ՀՀ ոստիկանությունից տեղեկացնում են, որ սեպտեմբերի 19-ին ոստիկանության Վանաձոր քաղաքի Տարոնի բաժնում հիվանդանոցային ահազանգ ստացվեց։
««Վանաձոր» բժշկական կենտրոնից հայտնեցին, որ գլխի հրազենային վնասվածքով 28-ամյա երիտասարդ է հոսպիտալացվել։ Հիվանդանոց մեկնած քրեական հետախույզները պարզեցին, որ երիտասարդը վնասվածքը ստացել է Վանաձորի Գորկու փողոցում, որտեղ անհայտ անձը որսորդական հրացանով կրակել էր նրա ուղղությամբ։
Ոստիկանության և քննչական կոմիտեի ծառայողները զզնեցին դեպքի վայրը՝ հայտնաբերելով որսորդական հրացանի երեք պարկուճ։ Հարուցվեց քրեական գործ՝ սպանության փորձի հատկանիշներով։ Սկսվեցին օպերատիվ-հետախուզական ծավալուն միջոցառումներ, որոնց միացան ոստիկանության քրեական հետախուզության գլխավոր վարչության ծառայողները։ Իրավապահները հենց դեպքի օրը հայտնաբերեցին հանցագործության գործիք հրացանը։ Այն ուղարկվեց դատաձգաբանական փորձաքննության։ Շուտով հայտնի դարձավ նաև առանձնապես ծանր հանցագործությունը կատարելու մեջ կասկածվող անձի ինքնությունը, որին հայտնաբերելու միջոցառումներին զուգահեռ ոստիկանության ծառայողները իրականացրին նաև բացատրական աշխատանք։
Արդյունքում դեպքից երեք օր անց՝ սեպտեմբերի 22-ի գիշերը, Վանաձորում ապրող 31-ամյա կասկածյալը կամավոր եկավ ոստիկանության Տարոնի բաժին։ Նա ոստիկանությունից ներկայացվեց դեպքի նախաքննությունը վարող մարմնին ու ձերբակալվեց։ Օպերատիվ-հետախուզական միջոցառումներն ու քննչական գործողությունները շարունակվում են դեպքի բոլոր հանգամանքները պարզելու ուղղությամբ։
Կատարվում է նախաքննություն»,- ասված է հաղորդագրությունում:
