ՌԴ-ից քաղաքական ապաստան խնդրած արդարադատության գեներալը սթափվելու կոչ է անում

Առանձնապես խոշոր չափերով գույք հափշտակելու, իր պաշտոնեական լիազորությունները չարաշահելու համար մեղադրվող և Ռուսաստանից քաղաքական ապաստան խնդրած ԴԱՀԿ նախկին պետ, նախկին պատգամավոր և արդարադատության գեներալ Միհրան Պողոսյանը հանդես է եկել հայտարարությամբ, որում, մասնավորապես, ասված է․

«Նախորդների սխալները չկրկնելու» կարգախոսի ներքո այսօր «ապամոնտաժվում» են պետական ինստիտուտների բաղադրիչը հանդիսացող լրջագույն օղակներ, վերացվում է տարիների ընթացքում որոշակի կայունության երաշխավոր դարձած կառավարման համակարգը։ Քարուքանդ անելով ամեն ինչ, տակնուվրա անելով եղած լավն ու վատը՝ խոստացված նորն այդպես էլ կյանքի չի կոչվում»։

Միհրան Պողոսյանն իր հայտարարությամբ հայտնում է, որ հեղափոխական փոփոխությունները այդպես էլ միս ու արյուն չեն առնում, դեկլարատիվ հայտարարություններից  ավելին չլինելով՝ նրանք ի հայտ են բերում նորանոր լրջագույն խնդիրներ՝ մոռանալով, որ իր կողմից կատարված չարաշահումների վերաբերյալ քրեական գործ հարոուցվեց հենց հեղափոխությունից հետո։

Արդարադատության գեներալը, որը նախընտրել է ապաստան խնդրել այլ պետությունից, իր հայտարարության մեջ խոսում է նաև, իր բնորոշմամբ, բախտի քմահաճույքով «գեներալ» դարձած զինվորականներից ոմանց մասին։

«Բախտի քմահաճույքով «գեներալ» դարձած զինվորականներից ոմանք, իրենց վստահված ծանր խաչը տանելու, «ուսադիրի պատիվը» բարձր պահելու փոխարեն դարձել են տարաբնույթ շոուների մասնակիցներ ու «սելֆիի» երկրպագուներ։ Հակառակորդի  կողմից  ձեռնարկվող, շարունակական դարձող լայնածավալ զորավարժությունների ֆոնին, ՀՀ ԶՈՒ ղեկավարն, օրինակ, ավելի շատ տարաբնույթ կենցաղային փառատոների մասնակիցն է դառնում, քան լինում է դիրքերում»,- նշում է Պողոսյանը։

Օֆշորներում միլիոններ կուտակած նախկին բարձրաստիճան պաշտոնյան իր հայտարարության մեջ անդարդարձ է կատարել նաև պետության առջև ծառացած մարտահրավերներին, որոնց  դիմագրավելու փոխարեն շարունակվում է լարվածության խորացումը, ինչին ուղղակի կամ անուղղակի նպաստում է գործող իշխանությունը։

«Հայաստանի ներկա վարչապետը դուրս չգալով «ընդդիմադիրի կերպարից» ու չդառնալով բոլորի ղեկավարը՝ հետևողականորեն հասարկությունը բաժանում է ըստ «գույների»։ Իրականում,սակայն, սթափվելու ժամանակն է՝ իրար հաջորդող սխալները կարող են անդառնալի հետևանքներ ունենալ երկրի համար»,- հայտարարում է Պողոսյանը՝ սթափության կոչ անելով բոլորին։