Ռոբերտ Քոչարյանը շարունակում է համոզված մնալ, որ ինքն անմեղ է և արդարացվելու է․ Արամ Օրբելյան. ՏԵՍԱՆՅՈՒԹ

Մեղադրող դատախազ Գևորգ Բաղդասարյանը հայտարարեց, որ Ռոբերտ Քոչարյանը ազատության մեջ մնալու դեպքում կխոչընդոտի գործի քննությանը․ «Բազմաթիվ ապացույցներ կան այն մասին, որ Ռոբերտ Քոչարյանին մեղսագրվող իրադարձությունների ժամանակ և հետո միջոցներ են ձեռնարկվել կատարվող գործողությունները քողարկելու, դրանց իրական բնույթը խեղաթյուրելու ուղղությամբ։ Բանակի ներգրավման փաստը քողարկելու համար զինվորական համազգեստների տարբերանշանները հանվել և փոխվել են, իրադարձություններին ներգրավված քաղաքացիական անձանց բաժանվել են զինվորական հագուստներ՝ քողարկելու համար նրանց իրական մասնակցությունը։ Առկա են ապացույցներ այն մասին, որ նախագահի աշխատակազմի ներկայացուցիչներ ջանքեր են գործադրել բանակի ներգրավման փաստը ներքաղաքական իրադարձություններին քողարկելու ուղղությամբ։ Սրանք բավարար են կանխատեսական հետևություններ անելու համար»։

Քոչարյանի փաստաբան Արամ Օրբելյանը դատարանի ուշադրությունը հրավիրեց այն հանգամանքի վրա, որ ըստ իրեն՝ գործի քննությանը խոչընդոտելու հիմքեր չկան․ «Ռոբերտ Քոչարյանը շարունակում է համոզված մնալ, որ ինքն անմեղ է և դատավարության արդյունքում արդարացվելու է։ Հակառակը հիմնավորող որևէ փաստարկ չկա։ Պարոն Քոչարյանը որևէ պետական պաշտոն չի զբաղեցնում։ Դավիթ Սանասարյանը չի գտնվում կալանքի տակ, թեև մեղադրվում է խոշոր չարաշահման գործով, նա փաստացի ղեկավարում է ՊՎԾ-ն, և եթե դատարանն ու Դատախազությունը գտել են, որ կալանքի հիմքեր չկան, ապա պարոն Քոչարյանի դեպքում ևս կալանքի հիմքեր չկան, կստացվի՝ նույնական հանգամանքներում տարբերակված մոտեցում է դրսևորվում։ Չի քննարկվում պարոն Քոչարյանին պատասխանատվության ենթարկելու հարցը, դա լինելու է դատաքննության փուլում։ Հիմա քննարկվում է պարզ հարց՝ պարոն Քոչարյանը ազատության մեջ կարո՞ղ է խոչընդոտել, թե՝ ոչ, իմ համոզմամբ՝ ոչ։ Խնդրում եմ միջնորդությունը բավարարել և փոխել պարոն Քոչարյանի խափանման միջոցը»,- նշեց Օրբելյանը:

«Գրավը չի կարող չեզոքացնել այն ռիսկերը, որոնք կարող են առկա լինել խափանման միջոցի փոփոխությունից հետո։ Այս միջոցը չի կարող արդյունավետ չեզոքացնել առկա ռիսկերը»,- ասաց փաստաբանը:

Տուժողների ներկայացուցիչ, փաստաբան Տիգրան Եգորյանը նշեց, որ քննարկման ենթակա է նաև կյանքի իրավունքի խախտման փաստը և դատաքննության փուլում դրան անդրադարձ է լինելու։

Մանրամասները՝ տեսանյութում:

Ռոբերտ Անանյան