06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Ադրբեջանի պլանն է՝ մի քանի ուղղություններով հարվածել Հայաստանին. Վան Համբարձումյանը՝ լայնածավալ գործողությունների վտանգի մասին
Քաղաքականություն
16.09.2019 | 19:47
Հայաստանի և Լեռնային Ղարաբաղի հետ կապված Ադրբեջանի պլանն է՝ միաժամանակ մի քանի ուղղություններով հարվածել Հայաստանին, այդ թվում՝ Նախիջևանի հատվածում: Այսօր լրագրողների հետ հանդիպմանն այս մասին ասաց ռազմական փորձագետ Վան Համբարձումյանը:
Վան Համբարձումյանը լայնածավալ ռազմական գործողությունների վտանգ է տեսնում. «Ուժերի մեծ կուտակումներ եմ արձանագրում: Այս կուտակումները սկսվել են 2018 թվականից, երբ ՀՀ-ում սկսվեցին իշխանափոխության գործընթացները, ներքաղաքական իրավիճակը սրվեց: Այդ օրերին Պաշտպանության նախարարությունն էլ էր լուրեր տարածում, որ սահմանին կուտակումներ կան, տեսանյութեր էին հրապարակվում, որ ուժերի կուտակումներ կան, ադրբեջանական սպառազինության և կենդանի ուժի մոտեցում սահմանին»:
Այս օրերին Նախիջևանում ընթացող զորավարժություններն էլ, ըստ փորձագետի, սահմանին շատ մոտ են: «Այս պահին Ադրբեջանի ԶՈՒ-ն օգտագործում է թուրքական արտադրության T-300 ռեակտիվ համազարկային կայանքներ՝ երկու տիպի կառավարվող հրթիռներ են, որոնցից մեկը 120 կմ հեռահարություն ունի: Կարող են պարզապես թիրախավորել Հայաստանի Հանրապետությունը: Երևանի հեռավորությունը Նախիջևանից ուղիղ գծով կազմում է 42 կմ: Պատկերացրեք՝ այդ զինատեսակը մոտեցնում են սահմանին, և կարող են ոչ թե պալիգոնում թիրախ խոցել, այլ կրակ բացել Երևանի ուղղությամբ: Իսկ Հայաստանի կարևոր ենթակառուցվածքները տեղակայված են մայրաքաղաքում»,- պարզաբանեց բանախոսը:
Վան Համբարձումյանի խոսքով՝ Ադրբեջանի ԶՈՒ-ն յուրաքանչյուր զորավարժության ժամանակ փաստացի նորանոր ուժեր է կուտակում սահմանի մոտ, այս զորավարժության ժամանակ՝ նույնպես. 10 հազար զինծառայող, հրթիռա-հրետանային սպառազինություն, նորագույն ռադիոէլեկտրոնային պայքարի նորագույն միջոցներ և այլն:
