27.09.2026 | 14:38
Համաշխարհային օլիմպիադա. Հայաստանի հավաքականները հաղթեցին վերջին տուրում
Եթե Արցախի իշխանությունն արհամարհում է 25.000 մարդուն, ես կգնամ նախագահի ընտրությունը տապալելու ուղով. Սամվել Բաբայան. ՏԵՍԱՆՅՈՒԹ
Քաղաքականություն
16.09.2019 | 19:00
Արցախի պաշտպանության նախկին նախարար Սամվել Բաբայանը Factor.am-ի հետ զրույցում անդրադառնալով «Մարտի 1-ի» գործով վաղվա դատական նիստին, հրապարակված աղմկահարույց ցուցմունքներին և առհասարակ այդ գործի քննությանը՝ դժվարացավ գնահատականներ տալ: «Ես գտնում եմ, որ բացի գրելուց՝ պետք է առերեսում անեն՝ ով ինչ է գրել, ինչի համար է գրել, ինչ նպատակ է հետապնդել։ Կարող է ցանկացած մեկն ինչ ուզի՝ գրի։ Ես տեղյակ չեմ անկեղծ, թե ինչի մասին է խոսքը։ Լսել եմ, բայց ինքս չեմ ծանոթացել»,- ասաց նա:
Անցած շաբաթ Արցախում ՏԻՄ ընտրություններ անցկացվեցին, որին ակտիվ մասնակցում էին նաև Սամվել Բաբայանի թիմակիցները։ Բաբայանը նորմալ է համարում անցած ընտրությունները և բավարարված է արդյունքներով:
«Արայիկ Հարությունյանն է հայտարարել, որ իրենք ջախջախիչ հաղթանակ են տարել, մեր թիմը մեր աջակիցներն են, ոչ մեկին չենք ջախջախել, ոչ մեկին չենք փորձել։ Նախորդ ընտրություններին չեմ մասնակցել, չգիտի՝ ինչով են տարբերվում, այս ընտրություններում հանգիստ ամեն մարդ դրել է, գնացել, ժողովուրդը ձայն է տվել։ Մինչև այդ վերևից որոշում էին՝ ով է գյուղապետը և վերջ։ Հիմա արդար, նորմալ մրցակցություն է եղել»,- ասաց նա՝ հավելելով, թե Արցախի որ համայնքի ղեկավարները խոչընդոտել են իրենց ստորագրահավաքին, իրենք կարողացել են չեզոքացնել այդ խոչընդոտողներին, ու այդ տեղերում հաղթել են իրենց թեկնածուները։
Բաբայանի թիմը նաև ավելի քան 19 հազար ստորագրություն է ներկայացրել Արցախի ԿԸՀ՝ սահմանադրական փոփոխություններ նախաձեռնելու համար, քանի որ առանց դրանց ինքը չի կարող առաջադրվել։ Մեր հարցին՝ ինչ է անելու, եթե Արցախի իշխանությունը չգնա սահմանադրական փոփոխությունների, պատասխանեց, որ սեպտեմբերի 22-ին կայանալու է նրա կուսակցության հիմնադիր համագումարը, և եթե ներկա ծրագրերը չեն ստացվում, ընտրելու են իրենց ճանապարհը։
«Իրականում 25 հազար ստորագրություն է եղել, ԿԸՀ-ն մոտ 20 հազարն է ընդունել։ Ստեղծում ենք կուսակցություն, կուսակցությունով գնում ենք պառլամենտական ընտրությունների, նախագահի թեկնածուներին բոլորին «ոչ» ենք ասում, ջնջում ենք ու ասում ենք՝ ոչ։ Եթե 50+1-ն ասում է՝ ոչ, ընտրությունը նախագահի մասով կայացած չի»,-թվարկեց նա։
Հստակեցմանը՝ պատրաստվո՞ւմ է տապալել Արցախի նախագահի ընտրությունները, Սամվել Բաբայանը պատասխանեց. «Իհարկե՛: Եթե դուք 25 հազար մարդուն արհամարհում եք, ինչի՞ նրանց իրենց հարազատներով ձեզ չարհամարհեն։ Ինչի՞, կարո՞ք եք մեզ բացատրել։ Խորհուրդ եմ տալիս՝ նստեն երկխոսության, 25 հազար մարդ հենց նենց չի ստորագրել։ Նրանց հետևում ևս կան մի այդքան, այնպես որ՝ իշխանություններին կոչ եմ անում նստել երկխոսության։ Դա սպառնալիք չէ։ Ես չեմ ուզում տապալել։ Բայց եթե դուք արհամարհում եք, ես քարոզարշավը տանում եմ այդ ուղղությամբ՝ պառլամենտի մեծամասնությունը վերցնենք, նախագահի բոլոր թեկնածուներին ջնջենք»:
Հարցազրույցն ամբողջությամբ՝ տեսանյութում։
Մարինե Խառատյան
