Մեր դռները ոչ ոքի առջև փակ չեն, բայց ՀԱՊԿ-ում որոշումներն ընդունվում են կոնսենսուսով․ Սեմերիկով. ՏԵՍԱՆՅՈՒԹ

Ինձ մոտ Ադրբեջանից որևէ դիմում, ոչինչ չկա, այդ հարցը չի քննարկվել: Երևանում ՀԱՊԿ անդամ պետությունների ռազմատնտեսական համագործակցության միջպետական հանձնաժողովի 17-րդ նիստի ավարտին լրագրողների հետ ճեպազրույցում ասաց ՀԱՊԿ գլխավոր քարտուղարի պաշտոնակատար Վալերի Սեմերիկովը:

«Ես վարչական պաշտոնատար անձ եմ կազմակերպությունում: Բոլոր դիմումները կամ խնդրանքները, որոնք վերաբերում են ՀԱՊԿ-ի դիտորդ, գործընկեր, անդամ դառնալուն, սահմանված կարգի համաձայն՝ դրանք պետք է քարտուղարություն ուղարկվեն: Ինձ մոտ Ադրբեջանից որևէ դիմում չկա: Այդ հարցը չի քննարկվել»,- ասաց Սեմերիկովը:

Նրա խոսքով՝ գոյություն ունեն գործընթացի կանոններ, կան դրույթներ, որոնք հաստատել են պետությունների ղեկավարները: «Գոյություն ունեն գործընկերների և դիտորդների համար պահանջներ, դրանք պետք է անպայմանորեն կատարվեն, որից հետո միայն կարող է քննարկվել անդամության, դիտորդության կամ գործընկերության հարցը: Մեր կայքում կարդացեք, թե ինչ պահանջներ են ներկայացվում, և ամեն ինչ պարզ կդառնա»,- հավելեց ՀԱՊԿ գլխավոր քարտուղարի պաշտոնակատարը:

Դիտարկմանը, որ ՌԴ փոխվարչապետ Յուրի Բորիսովը չբացառեց ՀԱՊԿ-ում Ադրբեջանին դիտորդի կամ գործընկերոջ կարգավիճակ տալու հնարավորությունը, մինչդեռ հայկական կողմը դա բացառում է, Վալերի Սեմերիկովը պատասխանեց. «Եկեք ելնենք ՀԱՊԿ-ի նորմատիվ-իրավական բազայից. բոլոր որոշումները, մասնավորապես, նրանք, որ վերաբերում են անդամակցությանը, դիտորդությանը, գործընկերությանը, ընդունվում են կոնսենսուսով: Եթե մեկ անդամ պետության համաձայնություն չլինի, իհարկե, որոշում չի լինի»:

Մանրամասները՝ տեսանյութում:

Նելլի Մելքոնյան