ՀԱՊԿ-ն միշտ կողջունի նախկին ԽՍՀՄ բոլոր պետությունների, այդ թվում՝ Ադրբեջանի հետ համագործակցությունը. ՌԴ փոխվարչապետ. ՏԵՍԱՆՅՈՒԹ

Դա միայն Ադրբեջանին չի վերաբերում, ՀԱՊԿ-ն միշտ կողջունի համագործակցությունը նախկին ԽՍՀՄ բոլոր պետությունների հետ: Երևանում ՀԱՊԿ անդամ պետությունների ռազմատնտեսական համագործակցության միջպետական հանձնաժողովի 17-րդ նիստի ավարտին լրագրողների հետ ճեպազրույցում անդրադառնալով Ադրբեջանին ՀԱՊԿ-ում դիտորդի կամ գործընկերոջ կարգավիճակ տալու հնարավորության մասին հարցին՝ ասաց ՌԴ փոխվարչապետ Յուրի Բորիսովը:

«Մենք, ամեն դեպքում, ժամանակին միասնական ընտանիք էինք, շատ ընդհանուր բաներ ունենք: Դա վերաբերում է նաև, այսպես ասենք, նախկին միութենական հանրապետությունների զինված ուժերի որոշակի հավասարակշռությանը»,- նշեց նա:

Բորիսովը հավելեց, որ բոլոր երկրների հետ ռազմատնտեսական համագործակցությանը վերաբերող հարցերում կշռադատված ու մտածված քաղաքականություն է վարվում, Ադրբեջանի պարագայում՝ մասնավորապես:

«Հավատացե՛ք, Ռուսաստանը հետաքրքրված չէ հակամարտության սրմամբ: Հակառակը, ամեն կերպ կփորձի աջակցել, որպեսզի այդ հակամարտությունը կարգավորվի: Դուք գիտեք այն դերը, որ այդ հարցում խաղում է Ռուսաստանը, մասնավորապես՝ նախագահը»,- ասաց նա:

Դիտարկմանը, որ հայկական կողմը բացառել է ՀԱՊԿ-ում Ադրբեջանին որևէ կարգավիճակ տալու ցանկացած հնարավորություն, իսկ ինքը հիմա չի բացառում նման հնարավորությունը, ինչպե՞ս սա հասկանալ, Յուրի Բորիսովը պատասխանեց. «Այս կազմակերպությունում որոշումները միասնաբար են ընդունվում, այդ պատճառով, եթե համապատասխան քննարկումներից հետո կազմակերպությունն ընդունի նման որոշման անհրաժեշտությունը, այն, իհարկե, կընդունվի այս կազմակերպության կանոնակարգին և կանոններին համապատասխան»:

Մանրամասները՝ տեսանյութում:

Նելլի Մելքոնյան