10.01.2025 | 19:29
Ադրբեջանի իշխանությունները բանտարկված իրավապաշտպանից պահանջել են հրաժարվել ԱՄՆ Պետդեպի մրցանակից
Քոչարյանը ոչ մի բանից չի խորշել, անգամ ժողովրդի վրա կրակելուց. Նինա Կարապետյանց. ՏԵՍԱՆՅՈՒԹ
Հասարակություն
12.09.2019 | 14:31
Քոչարյանն այն անձնավորությունն է եղել, որը ոչ մի բանից չի խորշել, անգամ սեփական ժողովրդի վրա կրակելուց, հետևաբար՝ իրեն աջակցող ուժերն ամեն ինչի ունակ են: Ոչ մի որոշումից չեմ զարմանա։ Այս մասին Երևանի ընդհանուր իրավասության դատարանի Շենգավիթի նստավայրի բակում հանուն և ընդդեմ Քոչարյանի բողոքի ակցիայի ընթացքում Factor.am-ի հետ զրույցում նշեց իրավապաշտպան Նինա Կարապետյանցը:
«Այս անվերջ տևող դատավարությունները, քննությունները վիրավորական են, ապտակ են ՀՀ քաղաքացիների համար: Ոչ լեգիտիմ կազմով դատարանի որոշումն ունի զրո արժեք։ Երանի ունենայինք դատախազություն, իրավապահ մարմիններ, որոնք քրեական պատասխանատվության կենթարկեին այն անձանց, որոնք հագել են դատավորի շոր, մտել են դատարանի տարածք և համարում են, որ Հայաստանի Հանրապետության անունից կարող են որոշումներ կայացնել։ Միևնույն է՝ հաղթանակը լինելու է ժողովրդինը և արդարադատությանը»,- ասաց իրավապաշտպանը։
Նրա խոսքով՝ այս հարցում ամբողջ բեռը մնում է մեկ դատավորի վրա։ «Այսօր Աննա Դանիբեկյանը պետք է շատ լավ հասկանա, որ ամբողջ պատասխանատվությունն ինքն անձնապես է կրելու և վաղն այս հարցը քննարկելիս նաև ինքն է լինելու ստեղծված լավ կամ վատ իրավիճակի մեղավորը»,- ասաց Նինա Կարապետյանցը։
Իրավապաշտպանը դժվարացավ նշել՝ արդյո՞ք դատավոր Աննա Դանիբեկյանը, ում ՀՀ երկրորդ նախագահ Ռոբերտ Քոչարյանի գործը մակագրված է, ճնշումների է ենթարկվել։
«Ակնկալում եմ, որ կին դատավորը կհասկանա, որ կանայք ուժեղ են և կարող են ճիշտ որոշում կայացնել, թեկուզ բոլորին հակառակ»,- եզրափակեց իրավապաշտպանը։
Մանրամասները՝ տեսանյութում:
