07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Սերժ Սարգսյանի հետախուզվող եղբայրն առաջադրված մեղադրանքը չի ընդունում
Հասարակություն
11.09.2019 | 15:14
«Առաջադրված մեղադրանքը Լևոն Սարգսյանը բացարձակապես չի ընդունում՝ այն հստակ հիմնավորմամբ, որ առնչություն չունի իրեն մեղսագրված արարքներին»,- Factor.am-ի հետ զրույցում ասաց երրորդ նախագահ Սերժ Սարգսյանի եղբոր՝ Լևոն Սարգսյանի պաշտպան Ամրամ Մակինյանը։
Երեկ, հիշեցնենք, հայտնի դարձավ, որ «Հյուսիս հարավ»-ի գործով որպես մեղադրյալ է ներգրավվել Սերժ Սարգսյանի եղբայր, հատուկ հանձնարարություններով նախկին դեսպան Լևոն Սարգսյանը։ Նրան մեղադրանք է առաջադրվել փողերի լվացման և իրական կամ ենթադրյալ ազդեցությունը շահադիտական նպատակով օգտագործելու համար։
Սարգսյանի պաշտպանը պնդում է՝ առաջադրված մեղադրանքն իրականության հետ աղերս չունի: «Պաշտպանական կողմն օրենքով չարգելված բոլոր միջոցները գործի է դնելու՝ Լյովա Սարգսյանի պատշաճ պաշտպանությունն իրականացնելու և մեղադրանքի հիմնազուրկ լինելը ցույց տալու համար»,- ասաց նա։
Բացի այս՝ Լևոն Սարգսյանը մեղադրվում է նաև ապօրինի հարստացման և հայտարարագրման ենթակա գույքը թաքցնելու համար։ Նա դեռևս անցած տարվա հոկտեմբերից հետախուզման մեջ է։
Մեր հարցին՝ հնարավո՞ր է, որ Սարգսյանն ինքնակամ ներկայանա Հայաստան և մասնակցի իր գործերով կայանալիք դատական պրոցեսներին, Ամրամ Մակինյանը պատասխանեց. «Եկեք մեր մտադրությունների մասին ես չկիսվեմ»։
Լիլիթ Շաբոյան
