«Արմաթ»-ի սաներն իրենց ստեղծած ծրագրերը կկարողանան ներկայացնել ինժեներական լաբորատորիաների կրթական ծրագրի նոր կայքում. ԼՈՒՍԱՆԿԱՐՆԵՐ

«Արմաթ» ինժեներական լաբորատորիաների կրթական ծրագիրը նոր կայք ունի։ Այսուհետ «Արմաթ»-ի ցանկացած սան, որը կայքում անձնական էջ ունի, կարող է իր ստեղծած ծրագրերը ներբեռնել այստեղ:

Ծրագրի համակարգող Սեդրակ Վարդանյանի խոսքով՝ կայքի թարմացման հիմնական նպատակը երեխաների կատարած աշխատանքները, նրանց հմտությունները և արդյունքները հավաքագրելն ու էլեկտրոնային հարթակում ցուցադրելն է։

«Սա էլեկտրոնային ուսուցման հասանելի և հարմարավետ հարթակ է, ինչպես նաև հնարավորություն՝ կրթական ծրագրի մշտադիտարկման արդյունքներն ավտոմատացված կերպով իրականացնելու»,- նշեց Սեդրակ Վարդանյանը։

Ինֆորմացիոն տեխնոլոգիաների ձեռնարկությունների միության ղեկավար Կարեն Վարդանյանը նշեց, որ ներկայում ևս մի քանի նոր ծրագիր են իրականացնում, որոնց թվում՝ «Իրական դպրոց»-ը, որտեղ երկհարկանի շենքի մի հատվածում ՏՏ ոլորտում գործունեություն ծավալող ընկերություններն են, մյուսում՝ ուսանողները։ Նրա խոսքով՝ «Արմաթ»-ի սաների համար սա լայն հնարավորություններ է ստեղծում։

««Գրանթ Թորնթոն Քնսալթինգ» ընկերության գնահատմամբ՝ մեր սաների 12 տոկոսը նոր ընկերություն է ստեղծում։ Դա ավելի մեծ թիվ է, քան, օրինակ, ԱՄՆ-ի հայտնի համալսարանների սաների դեպքում»,- ասաց Կարեն Վարդանյանը։

15-ամյա Նարեկ Սարգսյանը 10-րդ դասարանի աշակերտ է, մտադիր է ծրագրավորող դառնալ: «Արմաթ» լաբորատորիա արդեն 2-րդ տարին է հաճախում։

«Ինձ միշտ շատ է հետաքրքրել թե՛ ծրագրավորումը, թե՛ մոդելավորումը։ Ընդունվելուց հետո գիտելիքներս խորացրի։ Արդեն սկսել եմ ծրագրավորման լեզուներ ուսումնասիրել։ «Արմաթ-ն ընտանիք է, որի միջոցով այլ ընկերությունների մասնագետների հետ կարող եմ կապեր հաստատել»,- նշեց Նարեկը։

Ներկայում Հայաստանի, Արցախի և Վրաստանի տարածքում գործում են 280-ից ավելի «Արմաթ» ինժեներական լաբորատորիաներ, որտեղ ավելի քան 7.500 երեխա ստանում է անվճար ինժեներական կրթություն:

«Արմաթ» ինժեներական լաբորատորիաների խմբակավարների ներդրման ծրագրի համակարգող Սեդրակ Վարդանյանը տեղեկացրեց նաև, որ հավելեց, որ սեպտեմբերի 11-12-ը նախատեսում են այցելել Սյունիք, ինչպես նաև Գեղարքունիքի մարզի Չկալովկա և Արցախի Հաթերթ գյուղեր՝ ևս չորս նոր լաբորատորիա բացելու նպատակով:

Նելլի Մելքոնյան