Խախտումներ կան, բայց հենապատն ապամոնտաժել հնարավոր չէ. Արթուր Մեսչյանը՝ «չինական պարսպի» մասին. ՏԵՍԱՆՅՈՒԹ

Երևանի Քանաքեռ-Զեյթուն վարչական շրջանի Ուլնեցու փողոցի 8/10 և 8/12 հասցեներում վեր խոյացող «չինական պարիսպներն» ապամոնտաժել հնարավոր չէ, բայց աշխատանքները կատարվում են խախտումներով: Factor.am-ի հետ զրույցում այս մասին ասաց Երևանի գլխավոր ճարտարապետ Արթուր Մեսչյանը:

«Ինձ թվում է՝ այնտեղ նախագծային խնդիր է եղել: Զրոյական նիշը խախտել են: Նախագծով հենապատի բարձրությունը պետք է լիներ 8 մետր, եթե չեմ սխալվում, բայց եղել է 10, 12, 14 մետր: Այստեղ խնդիր կա, ապամոնտաժել հնարավոր չէ, որովհետև հենապատը լուրջ ծավալ է: Ես չգիտեմ… Այնտեղ պետք է ճարտարապետական մի լուծում գտնեն, պատը մի ձևով ձևավորեն, ճարտարապետական նորմալ տեսք տան: Մի մեծ պրոբլեմ չի»,- ասաց նա:

Երևանի գլխավոր ճարտարապետի խոսքով՝ հենապատից այն կողմ այգի է լինելու և բարեկարգ տարածք: Factor.am-ի հարցին՝ առանձնատուն լինելո՞ւ է, Արթուր Մեսչյանը պատասխանեց. «Կառուցապատում չի լինելու, առանձնատուն չի կառուցվելու»: Հարցին՝ Սերժ Սարգսյանի համար առանձնատուն չի՞ կառուցվում, գլխավոր ճարտարապետն ասաց. «Չգիտեմ, չէ»:

Հիշեցնենք, որ Ուլնեցու փողոցի 8/10 և 8/12 հասցեներում՝ Սարալանջի, ԱԱԾ ընդունելությունների տան հարևանությամբ արդեն մեկ ամիս է՝ ակտիվ շինարարություն է ընթանում: Կառուցվում են բարձր պարիսպներ, որոնք երևանցիներն արդեն հասցրել են անվանել «չինական պարիսպներ»:

Կառուցապատումն իրականացվում է խախտումներով: ՀՀ քաղաքաշինության, տեխնիկական և հրդեհային անվտանգության տեսչական մարմնի ստորաբաժանումն ուսումնասիրություններ է կատարել այս հասցեներում ու պարզել, որ շինարարական աշխատանքներն իրականացվել են քաղաքապետարանի կողմից հաստատված նախագծի շեղումներով, ինչը կարող է ազդել շինության ամրության, կայունության, հուսալիության վրա, վտանգ պարունակել մարդկանց և շրջակա միջավայրի համար: Ընկերությունը տուգանվել է 300 հազար դրամով:

Շինարարությունն իրականացնում է «Գրիար» ընկերությունը, որը պատկանում է Սերժ Սարգսյանի մտերիմ ընկեր և հետախուզման մեջ գտնվող ԴԱՀԿ նախկին պետ, օֆշորային սկանդալում ներգրավված Միհրան Պողոսյանի քեռուն՝ Գրիգորի Հարությունյանին: Նա մեզ հետ զրույցում վստահեցրել էր, որ այնտեղ այգի է լինելու:

Մանրամասները՝ տեսանյութում:

Նարեկ Կիրակոսյան