14.01.2026 | 13:48
Բոլորը ասում են` ինչո՞ւ է «Yandex GO»-ի գինը բարձր. Գեղամ Գևորգյանը մանրամասնում է․ ՏԵՍԱՆՅՈՒԹ
Ոստիկանների ուղղությամբ քարեր նետելու հրահանգ չի եղել․ դատարանում այսօր 4 վկա հարցաքննվեց․ ՏԵՍԱՆՅՈՒԹ
Հասարակություն
10.09.2019 | 19:25
2016 թվականի հուլիսի 29-ին Սարի թաղում տեղի ունեցած բախումների գործերով դատական նիստերը շարունակվում են։ Երևանի ընդհանուր իրավասության դատարանի Ավան և Նոր Նորք վարչական շրջանների նստավայրում դատավոր Վարդան Գրիգորյանի նախագահությամբ այսօր կայացավ «Հայաստանի կառուցողական» կուսակցության նախագահ Անդրիաս Ղուկասյանի գործով դատական նիստը: Դատական նիստին հարցաքննվեցին գործով անցնող վկաներից չորսը։
Ղուկասյանը մեղադրվում է 2016 թվականի հուլիսի 29-ին Սարի թաղում զանգվածային անկարգություններ կազմակերպելու համար։ Նա շուրջ 2 տարի անազատության մեջ մնալուց հետո 2018 մայիսի 7-ին ազատ արձակվեց։ Անդրիաս Ղուկասյանը, Սերժ Սարգսյանի հրաժարականից հետո, աղմկահարույց քրեական գործով ազատ արձակված առաջին բանտարկյալն էր։
Այսօրվա դատական նիստի մեկնարկին հարցաքննվեց ակտիվիստ Հարություն Աղլամազյանը: Նա ասաց` համաձայն չէ որ ամբաստանյալի աթոռին Անդրիաս Ղուկասյանն է հայտնվել։ Վկան ասաց` 2016 թվականի հուլիսի 29-ի դեպքերի ժամանակ քաղաքացիները հանգիստ են եղել, ոստիկանների և նրանց միջև բախման պատասխանատուն hենց ոստիկաններն են։
Հարցաքննվողների շարքում էր նաև 1in.am կայքի լրագրող Մարիամ Գրիգորյանը, որը այդ դեպքերի ժամանակ մարմնական վնասվածք էր ստացել ոստիկանների կողմից նետված լուսաձայնային նռնակների հետևանքով։ Լրագրողն ասաց` իրեն և ընկերներին ոստիկանները հորդորել են կանգնել մի կետում` ասելով որ դա անվտանգ տեղ է, իսկ վերջում նռնակները նետել են հենց այդ ուղղությամբ։ Իր գնահատմամբ՝ այդ ամենը միտումնավոր է եղել։ Վկան ասաց` հիշում է Անդրիաս Ղուկասյանը, Արմեն Մարտիրոսյանը իրենց կոչերով փորձել են հանդարտեցնել մարդկանց և որևէ բախման կոչ չի հնչել։
Դատարանում ուշագրավ հայտարարություն արեց այդ օրերին «Սիվիլնեթ» կայքում օպերատոր աշխատած Սարգիս Խարազյանը։ Նա մասնավորապես ասաց, որ մահակներով զինված քաղաքացիական հագուստով անձիք են եղել Սարի թաղում, որոնք համագործակցում էին ոստիկանների հետ։
Դատական նիստի ավարտին հարցաքննված վերջին վկան` ԱՄՆ քաղաքացի Վահագն Վարթանյանը պնդեց՝ այդ օրը Անդրիաս Ղուկասյանը, Արմեն Մարտիրոսյան, Դավիթ Սանասարյանը և ինքը քաղաքացիներին բազմիցս հորդորել են պահպանել հանգստություն և ոստիկանների ուղղությամբ քար նետելու կոչ որևէ մեկի կողմից չի հնչել:
Այսօրվա դատական նիստն ավարտվեց, հաջորդը կկայանա հոկտեմբերի 8-ին, կրկին կհարցաքննվեն գործով անցնող վկաներ։
Մանրամասները՝ տեսանյութում։
Լիլիթ Շաբոյան
