ՀԱՊԿ անդամ պետության կողմից Ադրբեջանին վաճառվող զինատեսակների հարցում հնարավո՞ր է արդյոք սահմանափակում մտցնել․ Մ. Մելքումյանը՝ Շ. Քոչարյանին. ՏԵՍԱՆՅՈՒԹ

Ազգային ժողովի սեպտեմբերի 10-ի նիստում քննարկվում է ««2002 թվականի հոկտեմբերի 7-ի Հավաքական անվտանգության պայմանագրի կազմակերպության կանոնադրությունում փոփոխություններ կատարելու մասին» երկրորդ արձանագրությունը վավերացնելու մասին» հարցը, որը պատգամավորներին է ներկայացնում արտաքին գործերի փոխնախարար Շավարշ Քոչարյանը։

Նշենք, որ այս արձանագրությամբ սահմանվում է ՀԱՊԿ դիտորդ և գործընկերոջ կարգավիճակը։

Ազգային ժողովի «Բարգավաճ Հայաստան» խմբակցության պատգամավոր Միքայել Մելքումյանը Շավարշ Քոչարյանից հետաքրքրվեց՝ ՀԱՊԿ անդամ պետության կողմից երրորդ երկրին զենքի վաճառելու իրավական կարգավորումից ու դրա հետ կապված ՀՀ-ի դիրքորոշումից։

Շավարշ Քոչարյանը նշեց, որ ՀԱՊԿ-ի հիմնարար փաստաթղթերում չկա այնպիսի դրույթ, որտեղ գրված լինի, որ ՀԱՊԿ անդամ պետությունները իրավունք չունեն զենք վաճառել երրորդ պետությանը, որը սպառնում է ՀԱՊԿ անդամ պետությանը, հետևաբար իրավական առումով այստեղ որևէ խնդիր չկա. «Բայց, ելնելով նրանից, որ մենք ուզում ենք, որ ՀԱՊԿ-ը լինի հեղինակավոր կազմակերպություն, ներսում եղած պարտավորությունները պետք է գերակա լինեն երկկողմ կամ բազմակողմ հարթակներում ստանձնած պարտավորություններին»։

Միքայել Մելքումյանը հարցրեց՝ իսկ հնարավոր չէ ՀԱՊԿ-ում սկսել մի գործընթաց և հասնել այնպիսի մի իրավական ակտի ստորագրման, որը հնարավորություն կտա ՀԱՊԿ անդամ պետության կողմից երրորդ երկրին վաճառվող զինատեսակների առումով որոշակի սահմանափակումներ մտցնելուն։

Ի պատասխան Քոչարյանը նշեց, որ հնարավոր է փորձել գնալ այդ ուղղությամբ, սակայն խոչընդոտները շատ լուրջ կլինեն։

Մանրամասները՝ տեսանյութում։

Աղավնի Սուքիասյան