«Դատարանը սպանում է ցմահի վերջին հույսը»․ Աշոտ Մանուկյանը զոհերի ծնողների ներմանն արժանացավ, դատարանինը՝ ոչ. ՏԵՍԱՆՅՈՒԹ

Դատարանը երեկ մերժել է ցմահ դատապարտյալ Աշոտ Մանուկյանին վաղաժամկետ ազատ արձակելու դիմումը։ Մանուկյանը շուրջ 23 տարի է՝ գտնվում է անազատության մեջ։ Այս տարիների ընթացքում կատարած հանցագործության համար զղջացել է, համալսարան է ընդունվել, ամուսնացել, զոհերի ծնողների կողմից ներման արժանացել, բայց պետությունը նրան չի ներում։

1996 թվականից անազատության մեջ գտնվող Մանուկյանը մեղադրվել և դատապարտվել էր երեք զինծառայողի սպանության համար: 19 տարեկանում նրան դատապարտել էին մահապատժի, որը, սակայն, 2003 թվականին փոխարինվել է ցմահ ազատազրկմամբ։ Իրավապաշտպան Ժաննա Ալեքսանյանն ասում է նոր իշխանության օրոք ցմահների գործերի հետ կապված խոստումներ են տրվել, որոնք, սակայն, դեռևս չեն իրագործվել:

«Մենք գիտենք որ այս երկիրը շատ անմարդակային երկիր էր, ցմահների մասին խոսք լինել չէր կարող, կարծես, արգելված թեմա էր, բայց այս նոր իշխանության օրոք խոստումներ տրվեցին, որ փոփոխություն կլինի, բայց տեսանք, թե ինչպես են խաբում, այդ մարդկանց վատ հոգեվիճակի մեջ դնում։ Ամեն մի ցմահ, որը կատարել է հանցագործություն, ամեն օր է զղջացել իր արածի համար»,- ասաց նա։

Քրեակատարողական վարչության հանրային կապերի բաժնից Factor.am-ին փոխանցեցին, որ ներկայումս Հայաստանում կա 91 ցմահ դատապարտյալ։ Հելսինկյան կոմիտեի փաստաբան Ռոբերտ Ռևազյանը պնդեց՝ այս վիճակագրությունը խոսում է Հայաստանի արդարադատության համակարգի թույլ լինելու մասին։ Ըստ Ռևազյանի՝ դատավորների մեծ մասը դրական բնութագիր ունեցող ցմահ դատապարտյալին ազատություն շնորհելու համարձակություն չունի։ Փաստաբանը պնդում է՝ այդ մերժումներով դատարանը սպանում է ցմահի վերջին հույսը։

Նշենք, որ եվրոպական մի շարք երկրներում՝ Շվեդիա, Գերմանիա, Բելգիա ցմահ ազատազրկումը մինչև 21 տարեկանների նկատմամբ չի կիրառվում, նրանց դատապարտում են անչափահասներին բնորոշ նորմերով։ Հայաստանում ցմահ դատապատրյալներից շուրջ 10-ն իրենց վերագրվող հանցագործությունը կատարել են զինվորական ծառայության ժամանակ: Այսինքն երբ նրանց 21 տարին դեռ չէր լրացել։

Մանրամասները՝ տեսանյութում։

Լիլիթ Շաբոյան