Եթե ՍԴ-ն ընդունի մեր փաստարկները, Ռոբերտ Քոչարյանը պետք է անհապաղ ազատ արձակվի. Հայկ Ալումյան. ՏԵՍԱՆՅՈՒԹ

«Մենք մեզանից կախված ամեն ինչ արդեն արել ենք, մնացածը արդեն․․․ Փաստաբանները ակնկալիքներից պիտի չխոսեն»,- ի՞նչ որոշում է ակնկալում Սահմանադրական դատարանից հարցին ի պատասխան ասաց Ռոբերտ Քոչարյանի շահերը ներկայացնող փաստաբան Հայկ Ալումյանը։

Հիշեցնենք, որ այսօր Սահմանադրական դատարանը քննում է «Մարտի 1»-ի գործով մեղադրյալ Հայաստանի երկրորդ նախագահ Ռոբերտ Քոչարյանի դիմումը։ Նա դատարանին խնդրել է ստուգել Քրեական դատավարության օրենսգրքի երկու հոդվածի սահմանադրականությունը։ Դրանք խափանման միջոց կիրառելու հիմքերի և քրեական գործի վարույթը կամ քրեական հետապնդումը բացառող մասերն են։

Սահմանադրական դատարանում կա ևս մի դիմում, մասնավորապես Քոչարյանի ներկայացուցիչն էր ամիսներ առաջ դիմել ՍԴ՝ խնդրելով որոշել Քրեական օրենսգրքի 300.1 հոդվածի՝ սահմանադրական կարգը տապալելու մասին դրույթի սահմանադրականությունը և նախագահի անձեռնմխելության ինստիտուտի էության հարցը։

Ալումյանը պարզաբանեց, որ Սահմանադրական դատարանը չի քննարկում և չի կարող որոշում կայացնել Քոչարյանին ազատ արձակել կամ չարձակել, այլ ՍԴ-ն քննարկում է Քոչարյանի նկատմամբ կիրառված օրենքի սահմանադրականության հարցը: «Եթե ՍԴ-ն իրավակիրառ պրակտիկան կճանաչի հակասահմանադրական, ապա դրանից հետո․․․ Եթե մեր բերած փաստարկները Սահմանադրական դատարանը ընդունեց, ապա Ռոբերտ Քոչարյանը պետք է անհապաղ ազատ արձակվի»,- ասաց երկրորդ նախագահի փաստաբանը։

Մանրամասները՝ տեսանյութում:

Ռոբերտ Անանյան