««Իմ քայլում» 88 հոգի ենք ու մեզ չի միավորում որևէ գաղափարախոսություն»․ Վարազդատ Կարապետյան. ՏԵՍԱՆՅՈՒԹ

ԱԺ «Իմ քայլը» խմբակցության անդամ Վարազդատ Գրիգորյանն ԱԺ-ում պատասխանել է լրագրողների հարցերին

-Ծառայողական քննություն է նշանակվել Ամուլսարի գործով քննչական խմբի ղեկավարի նկատմամբ՝ պարզելու համար, թե արդյոք նա անաչա՞ռ է քննել Ամուլսարի գործը։ Ըստ Ձեզ, նոր քրեական գործ պե՞տք է հարուցվի՝ հաշվի առնելով, որ Իվանյանը և Արամայիս Գրիգորյանը հորեղբոր որդիներ են։

-Քանի որ ծառայողական քննություն է նշանակված, եկեք սպասենք դրա արդյունքներին։ Ընդհանրապես ես կողմ եմ, որ պրոֆեսիոնալ դաշտում հարցերը լուծվեն։ Հիմա եթե ես իմ կարծիքը ասեմ՝ այո կամ ոչ, դրանից ոչինչ չի փոխվի։ Հիմա պրոֆեսիոնալ դաշտում հարցը քննարկվում է, ինչպես նաև քննարկվում է ՇՄԱԳ-ի հարցը Շրջակա միջավայրի նախարարությունում։ Վաղը մենք կունենանք դրա վերաբերյալ նախարարության կարծիքը։ Կոնկրետ ծառայողական քննության մասով կսպասենք արդյունքներին։

-Ձեր գնահատականը՝ քննչական մարմինների աշխատանքի վերաբերյալ, Դուք այդ աշխատանքն օբյեկտիվ համարու՞մ եք։

-Անձամբ ես և շատ այլ մարդիկ կարդալով «Էլարդ» ընկերության կողմից ներկայացված հաշվետվությունը, տեսնում էինք բազմաթիվ խնդիրներ, ինչը նաև վեր հանվեց տեսակոնֆերանսում վարչապետի ներկայությամբ, և կարծում եմ, որ սա բավարար էր, որպեսզի մենք հասկանանք, որ այլ տեսանկյունից պետք է նայել հասկանալու համար ամբողջ իրողությունը։ Եվ հիմա կառավարությունն այդ գործընթացի մեջ է։ Ես վստահ եմ, որ կառավարությունը շատ ավելի արդյունավետ որոշման կհանգի հիմա։

-Ամեն դեպքում Դուք կարծու՞մ եք, որ ճիշտ էր այդ ծառայողական քննությունը, որ հանրության մեջ կային այդ հարցադրումները, որ ո՞նց կարող է բարեկամը բարեկամի վրա քրեական գործ հարուցելու նյութ տա։

-Այո, անպայման, այո։

-Եթե նոր օբյեկտիվ ՇՄԱԳ իրականացվի, իսկապե՞ս Ամուլսարի շահագործումը անհնար կդարձնի, թե՞ հնարավոր է այնպիսի ՇՄԱԳ, որը կասի, որ բոլոր ռիսկերը կառավարելի են։

-Ձեր հարցը կրկին պրոֆեսիոնալ հարթության հարց է, այսինքն, պրոֆեսիոնալ կազմակերպությունների պատասխանատվությունը ենթադրող հարց է։ Իմ անձնական զգացողությունն այն է, որ նոր ՇՄԱԳ-ը չի անցնի փորձաքննությունը հաշվի առնելով գետերի ակունքները և այլն։ Բայց մենք այս հարցն էլ պետք է թողնենք պրոֆեսիոնալ դաշտի լուծմանը։

-Ձեր այն մտքին, թե ի՞նչ պատասխան ենք տալու տարիներ անց այն մորը, որը կարող է հաշմանդամ երեխա ունենալ, առանց ձեռքի, վարչապետն անդրադարձավ ասաց, որ անհնար է նման բան, առողջապահության նախարարը քննադատական խոսք հնչեցրեց, որ Ձեր ասածն անիրատեսական է, Դուք շարունակու՞մ եք պնդել Ձեր այդ մտահոգությունները։

-Ես երջանիկ կզգամ, որ հասկանամ, որ անիրատեսական են իմ պնդումները։ Շատ ուրախ կլինեմ, եթե դա այդպես լինի։ Մենք պետք է ևս մեկ անգամ վերլուծենք մեր հանքարդյունաբերական կենտրոնները՝ Քաջարանը, Ալավերդին, Արարատը, Կապանը, հասկանալու համար հիվանդությունների դինամիկան, և այն, թե հանքարդյունաբերությունն ինչպես է ազդում տարբեր հիվանդությունների ավելի բարձր հաճախականության երկրի այդ հատվածներում, որպեսզի կարողանանք ռեալ պատասխանել այդ հարցին՝ ևս մի հանքավայր շահագործելով կունենա՞նք հիվանդությունների աճ, թե՝ չէ, կամ ինչպիսի՞ ռիսկեր կան։ Սա մասնագիտական հարց է։ Ես կասկած չունեմ, որ հանքի շահագործումը շատ վատ ազդեցություն է ունենում մարդկանց առողջության վրա, բայց՝ ինչպիսի՞, սա նույնպես ուսումնասիրելու հարց է։

-Պարոն Կարապետյան, մամուլը գրեց, որ կանաչների խմբակցություն կարող է ստեղծվել «Իմ քայլի» ներսում, կա՞ն այդպիսի խոսակցություններ «Իմ քայլում»։

-Նմանօրինակ խոսակցություն չկա խմբակցությունում։ Բոլորը գիտեն, հասկանում են, որ առաջին անվերապահ արժեքը, որ բոլորս ունենք, մեր միասնությունն է և չենք կարող թույլ տալ, որ Հայաստանը հետ գլորվի։ Եվ այս մեծ նպատակի համար ամենակարևոր բանն այն է, որ «Իմ քայլը» խմբակցությունը միասնական լինի։

-Այդ իմաստով ինչպե՞ս եք գնահատում Վայոց ձորի մարզպետի և փոխմարզպետի հեռահար երկխոսությունը, որ՝ ոչ մի բան չեն անում, խնամի ծանոթով են գործի ընդունում։

-Ես հարցը չեմ ուսումնասիրել, բայց շատ լավ եմ գնահատում, որ հանրային խոսակցությունը կա։

-Խոսքը փոխմարզպետի ոճի մասին է, որին աշխատանքից հանել են․․․

-Ես չեմ կարող մեղադրել մարզպետին կամ փոխմարզպետին։ Ես գտնում եմ, որ նման հրապարակային խոսակցությունը միայն նպաստում է համակարգի առողջացմանը։

-Եթե պրոֆեսիոնալների կողմից ուսումնասիրություն լինի, և նրանք էլ հայտարարեն, որ ռիսկեր կան, բայց դրանք կառավարելի են, ինչպես այս դեպքում, Դուք կշարունակեք մնալ նույն կարծիքի՞ն։

-Գիտե՞ք, Ձեր ասած եթե-ն իր մեջ պարունակում է ևս 15 եթե և դրա հավանականությունը զրո է։ Այնպես որ եկեք չպատասխանեմ։

-Իսկ Էդգար Առաքելյանը պատասխանե՞լ է Ձեր նամակին և հնարավո՞ր է մանդատը վայր չդնի։

-Մենք կքննարկենք այդ հարցը, դեռևս չենք քննարկել, ես իրեն խնդրել եմ, որ մանդատը վայր չդնի։

-Իսկ նամակից հետո զրուցե՞լ եք։

-Չեմ հանդիպել։

-Դուք խոսում էիք «Իմ քայլի» միասնականությունից։ Կարելի է ասել, որ ով ունենա այլ տեսակետ, մանդատը վայր է դնելու, թե՞ դուք պատրաստ եք այլ կարծիք լսել խմբակցությունում։

-Ոչ, մեր խմբակցությունում շատերի վարքագծում այլ կարծիք կա և այդ կարծիքը հնչում է․․․

-Ու պարտադիր չէ, որ մանդատը վայր դնեն․․․

-Այո։ Մենք 88 հոգի ենք ու մեզ չի միավորում որևէ գաղափարախոսություն՝ սոցիալիստական, լիբերալ։ Եվ մենք հենց պետք է տարբեր կարծիքներ ունենանք և այդ տարբեր կարծիքների բախման արդյունքում մենք պետք է ստանանք ավելի լավ լուծում մեր երկրի համար։

-Երբ Դուք հայտարարեցիք, որ դեմ եք Ամուլսարի շահագործմանը, մամուլում հայտարարություններ եղան, թե ինչու՞ երբ Դուք նախկին իշխանության օրոք պաշտոն էիք զբաղեցնում և հանքի շահագործման որոշումը կայացվել էր, ինչու՞ հրապարակային Ձեր դիրքորոշումը չէիք արտահայտում։

-Այդ հարցն այդ ընթացքում հրապարակային բաց մեծ քննարկում չուներ, որպեսզի ես իմ դիրքորոշումն էդ հարցի վերաբերյալ արտահայտեի։ Այսինքն, Դուք չեք գտնի կողմ և չեք գտնի դեմ իմ արտահայտած որևէ տեսակետ այդ ընթացքում Ամուլսարի վերաբերյալ։ Ես այլ խնդիրներով էի զբաղվում։

Մանրամասները՝ տեսանյութում:

Մհեր Արշակյան