30.04.2026 | 10:10
Դրամն արժևորվել է․ արտարժույթների փոխարժեքները՝ ապրիլի 30-ի դրությամբ
Ադրբեջանի ԱԳ փոխնախարարը ԵՄ ներկայացուցչին դժգոհել է ՀՀ-ում դիտորդների ներկայությունից
Քաղաքականություն
09.01.2025 | 12:45
Ադրբեջանի արտաքին գործերի փոխնախարար Էլնուր Մամեդովը նախօրեին հանդիպել է Հարավային Կովկասում ԵՄ հատուկ ներկայացուցիչ Մագդալենա Գրոնայի գլխավորած պատվիրակությանը։
Ադրբեջանի ԱԳՆ-ի փոխանցմամբ՝ հանդիպմանը քննարկվել են Բաքվի և Բրյուսելի միջև երկկողմ և բազմակողմ համագործակցության օրակարգը, տարածաշրջանային անվտանգության հարցեր, այդ թվում՝ Ադրբեջանի և Հայաստանի միջև հարաբերությունների կարգավորման գործընթացի հեռանկարները։ Նաև նշվել է Ադրբեջանի և ԵՄ-ի միջև համագործակցության կարևորությունը տնտեսության և առևտրի, էներգետիկայի, տրանսպորտի և կապի ոլորտներում։ Անդրադառնալով Եվրոպայի էներգետիկ անվտանգության ոլորտում Ադրբեջանի դերին՝ «հույս է հայտնվել, որ այդ դերն էլ ավելի կմեծանա Ադրբեջանից Եվրոպա կանաչ էներգիա արտահանելու նախագծերի իրականացմամբ»։
«Մամեդովը ԵՄ ներկայացուցչին ներկայացրել է տարածաշրջանում տիրող իրավիճակը, Ադրբեջանի և Հայաստանի միջև խաղաղության համաձայնագրի նախագծի շուրջ բանակցությունների ներկա փուլը, երկկողմ ձևաչափում ձեռք բերված առաջընթացը։ Քննարկվել է ԵՄ հնարավոր աջակցությունը հայ-ադրբեջանական հակամարտության ընթացքում անհետ կորած ադրբեջանցիների ճակատագրի պարզաբանման, ականապատ տարածքների մաքրման, տարածաշրջանային կապերի վերականգնման գործում»,- ասված է հաղորդագրության մեջ։
«Ընդգծվել է, որ Հայաստանում ԵՄ առաքելության գործունեությունը և այդ երկրի զինումը Խաղաղության եվրոպական հիմնադրամի ֆինանսական աջակցությամբ չեն ծառայում հենց այդ խաղաղությանը, այլ ընդհակառակը, նման գործողությունները ուժեղացնում են ռևանշիստական տրամադրությունները Ադրբեջանի նկատմամբ»,-ասվում է Ադրբեջանի ԱԳՆ հայտարարության մեջ։
Հանդիպմանը մտքերի փոխանակություն է տեղի ունեցել երկկողմ և տարածաշրջանային այլ հարցերի շուրջ։
Հավելենք, որ ավելի վաղ Գրոնոն Բաքվում հանդիպել էր Ադրբեջանի նախագահ Իլհամ Ալիևին։
Թարգմանությունը՝ Էմմա Չոբանյանի
