30.04.2026 | 19:47
Չեմպիոնների լիգայում հայտնի է շաբաթվա լավագույն ֆուտբոլիստը
Բակո Սահակյանն ընդունել է ԱԳՆ կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովի մասնակիցներին
Քաղաքականություն
02.09.2019 | 16:52
ՀՀ ԱԳՆ-ից տեղեկացնում են, որ սեպտեմբերի 2-ին Արցախ կատարած այցի շրջանակներում ԱԳՆ կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովի մասնակիցներին ընդունել է Արցախի նախագահ Բակո Սահակյանը:
«Ողջունելով համաժողովի մասնակիցներին և կարևորելով նրանց այցելությունն Արցախ՝ Բակո Սահակյանը գոհունակությամբ ընդգծեց, որ նման այցերը կրում են պարբերական բնույթ և արդեն իսկ դարձել են ավանդական։
Շնորհակալություն հայտնելով ջերմ ընդունելության համար՝ ԱԳ նախարար Մնացականյանը բարձր գնահատեց նման ձևաչափով հանդիպման անցկացումը՝ նշելով, որ այն լավ հնարավորություն է ընձեռում անմիջական քննարկում ունենալ համահայկական հարցերի շուրջ և առաջին ձեռքից ծանոթանալ Արցախի առաջնահերթություններին։
Արցախի նախագահը համաժողովի մասնակիցներին ներկայացրեց Արցախում իրականացված սոցիալ-տնտեսական ծրագրերը և այդ ուղղությամբ ձեռնարկվող քայլերը, Արցախի անվտանգության համակարգը և այն ամրապնդելուն ուղղված քայլերը: Անդրադարձ կատարվեց նաև Հայաստան-Արցախ-Սփյուռք փոխգործակցության ընդլայնման ու խորացմանն ուղղված հարցերին:
Արցախի նախագահը և օտարերկրյա պետություններում ՀՀ դիվանագիտական ծառայության ղեկավարները մտքեր փոխանակեցին ԼՂ հիմնախնդրի խաղաղ կարգավորման, այդ թվում՝ միջազգային գործընթացներում Արցախի ժողովրդի լիարժեք ներգրավման շուրջ»,- ասված է հաղորդագրությունում:
