Մելիք Մանուկյանի` Շշի Մելոյի եղբայրը կմնա կալանքի տակ, դատարանը մերժեց պաշտպանի միջնորդությունը

ԱԺ նախկին պատգամավոր Մելիք Մանուկյանի` Շշի Մելոյի եղբոր՝ գործարար Ռոբերտ Մանուկյանի խափանման միջոցը փոխելու վերաբերյալ  միջնորդությունը դատարանը մերժեց. Ռոբերտ Մանուկյանը կշարունակի մնալ կալանքի տակ: Այս մասին Factor.am-ի հետ զրույցում ասաց Մանուկյանի պաշտպան  Հովսեփ Սարգսյանը։

«Դատարանը մերժեց խափանման միջոցը փոխելու վերաբերյալ մեր միջնորդությունը: Այսօր՝ ժամը 15:00-ին, Երևանի ընդհանուր իրավասության դատարանում կքննվի իմ պաշտպանյալ Ռոբերտ Մանուկյանին արդեն  գրավով ազատ արձակելու վերաբերյալ միջնորդությունը»,- ասաց Սարգսյանը՝ հավելելով, որ գրավի չափ պաշտպանական կողմը չի նշել՝ այն թողնելով  դատարանի հայեցողությանը:

Հիշեցնենք, որ Երևան-Սևան մայրուղու 15-րդ կմ հատվածում գտնվող կամրջի տակ նախապես տեղադրվել էր պայթուցիկ նյութ, որը 2019թ. օգոստոսի 02-ին` ժամը 12:30-ի սահմաններում, պայթեցվել էր՝ «Շշի Մելոյի» «Ռենջ Ռովեր» մակնիշի ու նրան ուղեկցող «Նիսան» և «Պատրուլ» տեսակի ավտոմեքենաների ընթացքի ժամանակ: Պայթյունի հետևանքով վնասվել էին ճանապարհով ընթացող Range Rover մակնիշի 555 LL 05 համարանիշի և Nissan մակնիշի 35 MD 686 համարանիշի ավտոմեքենաները, որոնցից առաջինը պատկանում է նախկին պատգամավորին, երկրորդ մեքենայի մեջ պայթյունի պահին եղել էին նրա թիկնապահները։ Ավելի ուշ մի քաղաքացի, առանց տեղում գործողություններ իրականացնող իրավապահների թույլտվության, պայթյունի հետևանքով վնասված մեքենաներից մեկով հեռացել էր՝ չենթարկվելով ոստիկանության ծառայողների օրինական պահանջներին։ Ձեռնարկված միջոցառումների արդյունքում կարճ ժամանակում մեքենան հայտնաբերվել և վերադարձվել է դեպքի վայր։ Իսկ դեպքի վայրից հեռացած քաղաքացուն հայտնաբերել ու ձերբակալել էին։

Ռոբերտ Մանուկյանը բերման է ենթարկվել և ձերբակալվել օգոստոսի 3-ին: Նրան մեղադրանք է առաջադրվել Երևան-Սևան ավտոճանապարհին տեղի ունեցած պայթյունի դեպքից հետո իշխանության ներկայացուցչի նկատմամբ բռնություն գործադրելու և արդարադատության իրականացմանն ու քննությանը խոչընդոտելու համար։

Աղավնի Սուքիասյան