Տեսանյութեր
26.08.2019 | 15:10Ուսումնասիրվե՞լ է արդյոք, թե «Լիդիան Արմենիա»-ի հետ պայմանագիրը ինչպես է կնքվել, ովքեր են, ի վերջո, Ամուլսարի հանքի բաժնետերերը և նախագահ Արմեն Սարգսյանը ինչ դեր է ունեցել այդ գործարքի կայացման գործում, ՔԿ-ում հրավիրված ասուլիսում այս հարցին ի պատասխան՝ Ամուլսարի գործով քննչական խմբի ղեկավար Յուրա Իվանյանն ասաց, որ «Լիդիան ինթերնեշնլ»-ի կայքում տեղադրված է ընկերության բաժնետերերի ցանկը և նաև այն ընկերությունների ցանկը, որոնք ֆինանսական ներդրումներ են կատարել ծրագրում․ «Ինչ վերաբերվում է Արմեն Սարգսյանի՝ բաժնետեր լինելու հանգամանքին, ապա այդ հարցի հասցեատերը Քննչական կոմիտեն չէ և կարող եք պարզել Լիդիան Արմենիա ընկերությունից»։
Նշենք, որ Հայկական բնապահպանական ճակատը օրերս հանրայնորեն հետևյալ հարցն էր ուղղել Քննչական կոմիտեին՝ արդյոք չե՞ն ուզում պարզել, թե ՀՀ կառավարության և «Լիդիան»-ի միջև եղած ի՞նչ խնդիրներ է հարթել 2013 թվականին ներկայիս ՀՀ նախագահ Արմեն Սարգսյանը, որն այն ժամանակ եղել է «Լիդիան»-ի տնօրենների խորհրդի անդամ, ոչ գործադիր տնօրեն։
«Թրանսփարենսի ինթերնեշնլ» հակակոռուպցիոն կենտրոնը օրերս կասկածներ հայտնեց, որ ՇՄԱԳ-ի հաստատման համար ճանապարհ է հարթել կոռուպցիան։ Մասնավորապես հարց է բարձրացվում՝ ինչպե՞ս է ընկերությունը առանց շահույթ ստանալու նվերներ արել․ «․․․ որպես փոխհատուցում փոխվել են կառավարության որոշումներ՝ հանուն հանքարդյունահանողների շահերի ու նաև 250 000 դոլար է ստացել «Լույս» հիմնադրամը, 120 000 դոլար՝ Ջերմուկի զարգացման հիմնադրամը, որի ղեկավարը Ջերմուկի քաղաքապետի որդին է և դրամական այս փոխանցումից հետո քաղաքապետ Վարդան Հովհաննիսյանն այլևս դեմ չի եղել հանքի շահագործմանը։ Սա երբևէ քննության առարկա դարձվե՞լ է»,- հարց է բարձրացրել կազմակերպությունը։
Ամուլսարի գործով քննչական խմբի ղեկավար Յուրա Իվանյանը պատասխանեց, որ կառավարության որոշումներն ընդունվում են օրենքի պահանջներին համապատասխան․ ««Լիդիան» ընկերությունը, ինչպես ցանկացած կազմակերպություն, կարող է կատարել նվիրատվություններ և այլն։ Կոռուպցիոն ռիսկերը․․․ եթե «Լիդիան» ընկերությունը գույքահարկ է վճարում համայնքին, ունի վարձակալած տարածքներ, դա նրա պարտականությունն է, որ պետք է կատարի։ «Լիդիան» ընկերությունը բավականին վաղ հայտարարել է դրա մասին։ Բոլորդ գիտեք, թե «Լույս» հիմնադրամը ինչով է զբաղվում՝ հանճարեղ երեխաներին, ուսանողներին գործուղել է արտասահման կրթության։ Դուք ունե՞ք հիմքեր, ապացույցներ, որոնք կվկայեն այդ նվիրատվության՝ կոռուպցիոն երևույթի մասին, կարող եք ներկայացնել վարույթն իրականացնող մարմնին»։
Նշենք, որ «Լույս» հիմնադրամի հիմնադիրներն են ՀՀ երրորդ նախագահ Սերժ Սարգսյանը և նախկին վարչապետ Տիգրան Սարգսյանը։
Մանրամասները՝ տեսանյութում:
Ռոբերտ Անանյան
