Ինչո՞ւ է չեղարկվել ՌԴ-ից մի քանի միլիոն դոլար արժողությամբ զինտեխնիկայի մատակարարման մրցույթը. ՊՆ-ի պարզաբանումը

Հայաստանում քրեական գործ է հարուցվել՝ «ծառայության հանդեպ անփույթ վերաբերմունքի» վերաբերյալ, իսկ պատճառը զենքի մատակարարման մրցույթի խափանումն է, որին ռուսական ընկերություն է մասնակցել և հաղթել: Այս մասին գրում է ՌԻԱ Նովոստի-ն:

Մայիսին ՀՀ պաշտպանության նախարարությունը պատմության մեջ առաջին անգամ մի քանի միլիոն դոլար արժողությամբ ռազմական տեխնիկայի մատակարարման մրցույթ է հայտարարել: Ներկայացված պահանջներին համապատասխանել է միայն մեկ ընկերություն՝ ռուսական ORSIS-ը: Շուտով, սակայն, մրցույթը փակվել է՝ առանց պատճառաբանության:

Աղբյուրի փոխանցմամբ՝ ORSIS-ը դիմել է վերաքննիչ հանձնաժողով և Հայաստանում իր շահերը ներկայացնող իրավաբանի, որից հետո հայց է ներկայացվել դատարան: ՀՀ պաշտպանության նախարարությունից ՌԻԱ Նովոստիի հետ զրույցում հաստատել են քրեական գործի հարուցումը, սակայն լրացուցիչ տեղեկություն տրամադրել հրաժարվել են՝ պատճառաբանելով, որ դա հնարավոր կլինի քննչական մարմինների աշխատանքի ավարտից հետո միայն:

Factor.am-ը նշված հրապարակման վերաբերյալ փորձեց մեկնաբանություն ստանալ Պաշտպանության նախարարությունից: Մեզ հետ զրույցում ՊՆ խոսնակ Արծրուն Հովհաննիսյանը նշեց. «Պաշտպանության նախարարությունը որևէ մեկնաբանություն չի կարող հայտնել նշված հրապարակման մասին, քանի որ այս հարցը գտնվում է գաղտնիության շրջանակում: Բացի այդ, մեկնաբանություն չի կարող տրվել մի գործի մասին, որը գտնվում է նախաքննության փուլում»։

Աղավնի Սուքիասյան