Այդ ի՞նչ քրեածին վիճակ է, որ Ջերմուկում Ոստիկանությունը մեծ ուժեր է կենտրոնացնում․ Արթուր Սաքունց․ ՏԵՍԱՆՅՈՒԹ

Քաղաքացիական և քաղաքական շարժումների նկատմամբ Ոստիկանությունը պարբերաբար օգտագործվել է պատժելու նպատակով, և այս համատեքստում  տեղին է հիշել նախկին ոստիկանապետի այն ինքնախոստովանությունը, որ քաղաքական իշխանությունը տարբեր հարցերով բողոքող  քաղաքացիների դժգոհություններին դիմագրավում է Ոստիկանության միջոցով։

Այս մասին այսօր հրավիրված քննարկման ժամանակ ասաց ՀՔԱ Վանաձորի գրասենյակի ղեկավար Արթուր Սաքունցը։

«Սա այն արատավոր կոնցեպտն է, որի արտահայտումը հանդիսացավ վերջին օրերին Ամուլսարի հարցով միջադեպը: Սա լուրջ մարտահրավեր է, ուստի առաջարկում ենք հասարակական կարգը պահպանող Ոստիկանությանն առանձնացնել քրեական ոստիկանությունից․ հասարակական կարգը պահպանող ոստիկանների գործառույթը պետք է լինի հավաքներ անցկացնող քաղաքացիների իրավունքի կիրառմանը խոչընդոտող գործոնների վերացումը։ Պետք է լինի, օրինակ, Ներքին գործերի նախարարություն, որը կդառնա քաղաքականություն մշակող մարմին, իսկ Ոստիկանությունը՝ այն կատարող»,- ասաց  ՀՔԱ Վանաձորի գրասենյակի ղեկավարը։

Սաքունցի փոխանցմամբ՝ Ամուլսարի հարցով տեղի ունեցած հավաքի ժամանակ ոստիկանական գործողություններն ահազանգ են, որ պետք է փոփոխություններ կատարվեն ասյ համատեքստում։

«Մենք հիմա էլ տեղեկություն ենք ստանում, որ ոստիկանական ուժեր են կենտրոնանում Ջերմուկում, ինչո՞ւ, այդ ի՞նչ հանցածին, քրեածին  իրավիճակ է, որ Ոստիկանության ուժերի մեծ կենտրոնացում է կատարվում։ Եթե քաղաքացիների՝ ազատ հավաքների իրավունքի իրականացումը շարունակվի դիտարկվել որպես քրեածին երևույթ, որի համար պետք է ոստիկանական մեծ ուժեր կուտակել, ապա սա ահազանգ է, որ պետք է անցնել կտրուկ դատաիրավական փոփոխությունների»,- ասաց նա։

Մանրամասները՝ տեսանյութում։