«Մթոմ ես կարամ քայլեմ, որ մի հատ էլ փախնեմ»․ Սեյրան Սարոյանը՝ իր տանը տեղի ունեցած «ռազբորկայի» մասին․ ՏԵՍԱՆՅՈՒԹ

ԱԺ նախկին պատգամավոր, գեներալ Սեյրան Սարոյանն այսօր մամուլի ասուլիս էր հրավիրել՝ անդրադառնալով մամուլում տեղ գտած այն հրապարակումներին, ըստ որոնց՝ ոստիկանները խուզարկություն են իրականացրել նրա տանը, որտեղ «ռազբորկա» է եղել:

«Շատ վատ երևույթներ են սկսվել Հայաստանում: Որ կայքը մտնում ես, քֆուր-քյաֆար է: Ինչքան ճանաչված մարդ կա, պետք է խայտառակեն, պախարակեն, չգիտես՝ ինչ ուժեր են, ովքեր են: Մի քանի անգամ փորձեցին իմ մասով բաներ գրել: Մի հատ ուսումնասիրեք, թե ում է պետք, որ ազգի գեներալներին, արվեստագետներին փորձեն փչացնել: Ո՞ւմ է սա պետք, ո՞ւր ենք գնում: Ես դեռ մի քանի ամիս առաջ ասացի, որ մի քիչ համբերեք, մենք այն ազգն ենք, որ հեսա Նիկոլին էլ կսկսենք քլնգել: Տեսա՞ք, որ ես ճիշտ էի: Ինչո՞ւ մենք չենք սիրում մեզ, այսօր այնպիսի մթնոլորտ է, որ ամբողջ ազգն իրար թշնամի է»,- ասաց Սարոյանը:

Նա նշեց, որ իրականությանը չեն համապատասխանում տեղեկությունները, թե ոստիկանները խուզարկություն են իրականացրել իրենց տանը, ինքն էլ, իբր, փախել է. «Մթոմ ես կարամ քայլեմ, որ մի հատ էլ փախնեմ: Մեր տանը խուզարկություն չի եղել: Կարո՞ղ էին զանգել ոստիկանություն ճշտել կամ ինչի՞ համար պետք է խուզարկեին»:

Ինչ վերաբերում է նրան, որ իրենց տանը «ռազբորկա» է եղել, Սեյրան Սարոյանն արձագանքեց. «Սա օջախ է, երեխեքս, մերս են: Որտե՞ղ ես լսել, որ օջախում «ռազբորկա» անեն»:

Դիտարկմանը, թե գուցե դիմեք իրավապահներին՝ պարզելու, թե ով է կանգնած այդ տեղեկության հետևում, գեներալը հեգնանքով պատասխանեց. «Ես տենց մա՞րդ եմ, որ բողոք գրեմ»:

Սեյրան Սարոյանը նշեց, որ 5 ամիս ԱՄՆ-ում բուժվելուց հետո եկել է Հայաստան, որտեղ ամեն օր իր բարեկամներն ու ընկերներն այցելում են, ուզում են տեսնել:

Նշենք, որ այսօր «Ժամանակ» թերթը գրել էր. «Օգոստոսի 18-ին ոստիկանությունը հատուկ գործողություն է իրականացրել ԱԺ նախկին պատգամավոր, գեներալ Սեյրան Սարոյանի Էջմիածնում գտնվող տանը: Ոստիկանությունը տեղեկություն է ունեցել, որ Սարոյանի բնակարանում ընթանում է ինչ-որ «ռազբորկա», որի մասնակիցները փողեր ստանալու հետ կապված վիճաբանության մեջ են:
Ոստիկանությունը բերման է ենթարկել Սարոյանի տանը հավաքվածներին: Ըստ մի վարկածի՝ Սարոյանը տանը չի եղել, մեկ այլ վարկածով՝ նա հասցրել է փախչել հետնամուտքով»:

Մանրամասները՝ տեսանյութում:

Նարեկ Կիրակոսյան