11.12.2024 | 23:30
Թուրքիան Մեծ Բրիտանիայից շահագործումից հանված Super Hercules ռազմատրանսպորտային ինքնաթիռներ կգնի
Ռուբեն Հայրապետյանի պաշտոնավարումը չի երկարաձգվել, հետևաբար նրա լիազորությունները համարվում են դադարեցված. փաստաբան
Հասարակություն
16.08.2019 | 17:54
2019 թվականի հունիսի 28-ի դրությամբ Ռուբեն Հայրապետյանի պաշտոնավարումը չի երկարաձգվել՝ հետևաբար՝ իրավունքի ուժով, վերջինիս լիազորությունները համարվում են դադարեցված։ Այս մասին իր ֆեյսբուքյան էջում գրել է փաստաբան Ալեքսանդր Կոչուբաևը՝ անդրադառնալով ՀՊՏՀ-ի ժամանակավոր պաշտոնակատար Ռուբեն Հայրապետյանի պաշտոնավարմանը։ Նշենք, որ Ալեքսանդր Կոչուբաևը ներկայացնում է Տնտեսագիտական համալսարանի՝ աշխատանքից ազատված դասախոսների շահերը։
«Սա այն հրամանն է, որով ՀՀ ԿԳՆ նախարար Արայիկ Հարությունյանը Ռուբեն Հայրապետյանին նշանակել է ՀՊՏՀ-ի ժամանակավոր պաշտոնակատար։
Նշված հրամանի համաձայն Ռուբեն Հայրապետյանը նշանակված է մինչև ՀՀ օրենդրությամբ սահմանված կարգով ռեկտորի ընտրությունն ու նշանակումը։
ՀՊՏՀ-ի կանոնադրության 1-ին կետի համաձայն՝ Հայաստանի պետական տնտեսագիտական համալսարանը շահույթ ստանալու նպատակ չհետապնդող, իրավաբանական անձի կարգավիճակ ունեցող պետական ոչ առևտրային կազմակերպություն է ։
Պետական ոչ առևտրային կազմակերպությունների գործադիր մարմինների նշանակման ընդհանուր կարգը սահմանված է ՀՀ կառավարության 2005 թվականի հունվարի 25-ի թիվ 224-Ն որոշմամբ հաստատված կարգով /այսուհետ՝ Կարգ/։
Կարգի 11․3-րդ կետի համաձայն՝ պաշտոնի նշանակելու իրավասություն ունեցող անձը պետական ոչ առևտրային կազմակերպության տնօրենի թափուր պաշտոնում ժամանակավոր պաշտոնակատար նշանակում է մինչև վեց ամիս ժամկետով։
Կարգի 11.4-րդ կետի ուժով՝ եթե գործադիր մարմնի թափուր պաշտոնի համար հայտարարված մրցույթը համարվում է չկայացած, ապա ժամանակավոր պաշտոնակատարի պաշտոնավարման ժամկետը կարող է երկարաձգվել մեկ անգամ՝ 3 ամիս ժամկետով։
Քննարկվող դեպքում՝ Ռուբեն Հայրապետյանը 2018 թվականի դեկտեմբերի 28-ից նշանակվել է ՊՈԱԿ-ի ղեկավարի պաշտոնակատար՝ 6 ամիս ժամկետով։ Դրանից հետո Կարգի ուժով պետք է անցկացվեր մրցույթ և նշանակվեր ՊՈԱԿ-ի ղեկավար, իսկ եթե այդպիսի մրցույթը համարվեր չկայացած, ապա Ռուբեն Հայրապետյանի ժամանակավոր պաշտոնավարումը պետք է երկարաձգվեր ևս մեկ անգամ 3 ամիս ժամկետով։
2019 թվականի հունիսի 28-ի դրությամբ Ռուբեն Հայրապետյանի պաշտոնավարումը չի երկարաձգվել՝ հետևաբար՝ իրավունքի ուժով, վերջինիս լիազորությունները համարվում են դադարեցված։
Մինչդեռ Ռուբեն Հայրապետյանը շարունակում է իր վարքագիծը որպես ՊՈԱԿ-ի ղեկավարի պաշտոնակատար, տնօրինում է ՊՈԱԿ-ի ֆինանսական միջոցները, ստորագրում է հրամաններ, ներկայացնում է ՊՈԱԿ-ը մամուլում, պետական այլ մարմիններում։
Հետևությունները թողնում եմ ընթերցողին․․․»,–գրել է Կոչուբաևը։
