Հիմք չկա որևէ մեկին քրեական հետապնդման ենթարկելու. մանրամասներ Ամուլսարի գործից․ ՏԵՍԱՆՅՈՒԹ

ՀՀ Քննչական կոմիտեի նախագահ Հայկ Գրիգորյանը Կառավարության նիստի ժամանակ գործադիրի անդամներին երկայացրեց Ամուլսարի փորձագիտական եզրակացության արդյունքները:

«Ամուլսարի ստորգետնյա ջրերի և Ջերմուկի տերմալ աղբյուրների միջև որևէ կապ չկա, սակայն երկրաշարժի պարագայում հնարավոր է թթվային դրենաժի ինչ-որ կոնցենտրացիայի ներթափանցում Սպանդարյան-Կեչուտ ջրամբարի միջոցով Սևանա լճի ավազան, բայց այդ կոնցենտրացիայի ազդեցությունը Սևանա լճի ավազանի ծավալներում աննշան կլինի»,- ասաց նա:

Նա նշեց, որ Ամուլսարի ստորգետնյա ջրերի հավանական ազդեցությունն է Դարբ, Արփա, Որոտան գետերի վրա: Հայկ Մարտիրոսյանը ներկայացրեց, որ համաձայն եզրակացության՝ դրա ազդեցության ռիսկերը կառավարելի կլինեն, եթե «Լիդիան» ՓԲԸ-ն ձեռնարկի փորձագիտական խմբի կողմից ներկայացվող 16 մեղմման միջոցները:

Հայկ Գրիգորյանը նշեց, որ «Լիդիան»-ի փորձագետները 16 առաջարկվող մեղմման միջոցներից 15-ն ընդունել են, որից տասն արդեն կիրառվում է: «Մեկ մեղմման միջոցն է, որ դեռ քննարկման փուլում է: Համաշխարհային բանկից գումար ստանալու համար «Լիդիան»-ն իր գործունեությունը պետք է համապատասխանեցնի AFC ստանդարտին, որով նախատեսվում է, որ հանքի օգտագործումից հետո հարյուր տարի պետք է մեղմման միջոցներ կիրառել»,- ասաց նա:

Ամփոփելով՝ վարչապետն ասաց, որ Կառավարության ներկայացուցիչները կծանոթանան փաստաթղթին և կգան ընդհանուր եզրակացության:

Հայկ Գրիգորյանը հավելեց, որ ստացված եզրակացությունը թույլ է տալիս այս փուլում ենթադրելու, որ մեկ տարուց ավելի քննվող քրեական գործով որևէ հիմք չկա որևէ մեկին քրեական հետապնդման ենթարկելու:

Մանրամասները՝ տեսանյութում: