18.09.2026 | 07:58
Փաշինյանն աշխատանքային այցով մեկնել է Գերմանիա․ նրան կշնորհվի Հեսսեյան Խաղաղության մրցանակը
«Ոչ մի աջակցություն չենք ուզում, միայն Կառավարության թույլտվությունն է պետք»․ հայ գործարարները ցանկանում են Հայաստանի մարզերում կանեփազգի բույս աճեցնել
14.08.2019 | 15:01
Հեմփ տեսակի կանեփազգի բույսի մեջ բացակայում է հոգեմետ ակտիվ այն նյութը, որը կա մարիխուանայի մեջ։ Հակառակը, այս բուսատեսակը սիբիդի կոչվող յուղ է պարունակում, որը չափազանց օգտակար է մարդու օրգանիզմում բոլոր գործառույթների հավասարակշռությունը պահելու համար։
Այս մասին այսօր՝ «Նոր արտադրություն առաջին անգամ Հայաստանում՝ Հեմփ տեսակի կանեփազգի բույսի աճեցում և վերամշակում՝ Հայաստանի տնտեսությունը միջազգային լուրջ բարձունքների հասցնելու կոնկրետ երաշխիքով։ Ներկայացնում են հայ գործարաները» թեմայով ասուլիսի ընթացքում ասաց «Արմերիկա» ՍՊԸ-ի հիմնադիր տնօրեն Ռուբեն Մկրտչյանը։
Գործարարի խոսքով՝ իր ներկայացրած ծրագիրը բուսատեսակների անվանումների հետ կապված խնդիրների պատճառով է տուժում։
«Հեմփ տեսակի մշակաբույսն իր տեսքով նման է կանեփին։ Բացի այդ, «հեմփ» անվանումը հայերենում չկա, անգլերենում են այն այդպես անվանում։ Այդ բույսն ԱՄՆ-ում միայն անցյալ տարի դեկտեմբերին է օրինականացվել»,- նշեց Ռուբեն Մկրտչյանը։
«Արմերիկա» ՍՊԸ-ի հիմնադիր տնօրենն ընդգծեց, որ արդեն հանդիպում է ունեցել նախկին երեք գյուղնախարարների հետ, որոնց ներկայացրել է իր ծրագիրը։ Նա նաև նշեց, որ հանդիպում է ունեցել փոխվարչապետ Տիգրան Ավինյանի գրասենյակում՝ նրա օգնականներից մեկի հետ։
«Համաձայնել էին մեզ 1 հա տարածք տրամադրել։ Խնդրեցի՝ հնարավո՞ր է տարբեր շրջաններում փորձենք, ասացին ՝ «ինչու՞ ոչ, որքան ուզեք, միայն թե հետևելով այն պայմանագրերին, որոնք ունեք իրավապահների հետ։ Ամեն բան գրեթե հարյուր տոկոսով պատրաստ է, մնում է միայն այս բույսը մշակել և արտահանել։ Այս կերպ կարող ենք Հայաստանին մեծ թվերով տնտեսական շահույթ բերել։ Ոչ մի տեսակի աջակցություն չենք ուզում, միայն Կառավարության կողմից թույլտվություն է պետք»,- ասաց գործարարը։
Նա հավելեց, որ բույսի փորձնական աճեցումը Սուրենավանում, Վարդենիսում, Իջևանում և Արտաշատում են իրականացնում։ Ռուբեն Մկրտչյանը վստահեցրեց, որ իրավապահ մարմինները տարածքներն ուսումնասիրել են և բանավոր համաձայնություն տվել։
Գործարարը նշեց, որ ցանկություն ունի նաև վարչապետ Նիկոլ Փաշինյանին հանդիպել և ծրագիրը քննարկել և ինքը կարողանա այս բուսատեսակի աճեցմամբ և արտահանմամբ զբաղվել։
«Բույսն աճեցնելու թույլտվությունը մոտ երեք ամիս ուշ ստացվեց։ Եթե գարնանն ունենայինք, արդեն արդյունք կունենայինք։ Այս ծրագրի մեջ շատ մեծ գումարներ են ներդրվելու»,- ասաց Ռուբեն Մկրտչյանը։
Նա ընդգծեց, որ հեմփ տեսակի կանեփազգի բույսի աճեցումը նաև ջերմոցային պայմաններում է հնարավոր։ Ըստ նրա՝ այդ դեպքում արդյունքները կտասնապատկվեն։
«Արմերիկա» ՍՊԸ-ի գիտաարտադրական հարցերով խորհրդական Իշխան Հովհաննիսյանն էլ հավելեց, որ հեմփ տեսակի կանեփազգի բույսն օգտակար կլինի տեքստիլ արդյունաբերության, ինչպես նաև կոսմետիկ միջոցների պատրաստման համար։
Նրա խոսքով՝ թեպետ բույսի հիմքով պատրաստված հագուստը և կոսմետիկ միջոցները թանկարժեք կլինեն, հայկական շուկայում դրանք համեմատաբար մատչելի գներով կներկայացվեն։
«Կարծիքներ կան, որ այդ բույսը նույնիսկ քաղցկեղ կարող է բուժել»,- եզրափակեց Իշխան Հովհաննիսյանը։
Նելլի Մելքոնյան
