Վարչապետ Նիկոլ Փաշինյանն այսօր գիշերելու է Գյումրիում:
Factor.am-ին հայտնի դարձավ, որ նա ցանկացել է վաղը շրջել Գյումրու թանգարաններում: Այս տեղեկությունների շուրջ Նիկոլ Փաշինյանի մամուլի խոսնակ Վլադիմիր Կարապետյանն ասաց, որ վարչապետի ծրագրերը մասնավոր են եւ ինքը տեղեկություններ չունի:
Մեզ հայտնի դարձավ, որ Նիկոլ Փաշինյանը գիշերելու է «Վիկտորիա Պլազա» հյուրանոցում: Այն գտնվում է Գյումրու կենտրոնական հրապարակում եւ պատկանում է Խաչատուր Սուքիասյանի ընտանիքին:
Հիշեցնենք, որ Նիկոլ Փաշինյանն այսօր աշխատանքային այցով մեկնել էր Շիրակի մարզ: Նա նախ Մարալիկ քաղաքում մասնակցել էր բամբակամանվածքային գործարանի վերագործարկման արարողությանը, այնուհետ մեկնել Գյումրի:
Factor.am-ին փոխանցեցին, որ Մարալիկում վարչապետին չի դիմավորել Անի խոշորացված համայնքի ղեկավար Արտակ Գեւորգյանը:
Նա ՀՀԿ-ական է, մտերիմ է ԱԺ նախկին նախագահ Սամվել Նիկոյանի հետ: Փորձեցինք Արտակ Գեւորգյանից ճշտել, թե ինչու չի դիմավորել վարչապետին, բայց նա չպատասխանեց մեր զանգերին:
Հեղափոխությունից հետո մի խումբ մարալիկցիներ պահանջում են Արտակ Գեւորգյանի հրաժարականը: Նիկոլ Փաշինյանը նախընտրական քարոզարշավի ժամանակ նշել էր, որ կառավարությունը չի կարող միջամտել ՏԻՄ-ի գործունեությանը:
«Այն պահին, երբ կլինեն շատ հիմնավոր փաստարկներ, որ դա համայնքի մեծամասնության տեսակետն է, այդ ժամանակ էլ կառավարությունը կմիջամտի: Մեզ առանց այն էլ մեղադրում են, որ մենք միակուսակցական համակարգ ենք ստեղծել: Մենք այն քայլերով պետք է գնանք, որ մեր երկրում հավասարակշռված մոտեցումներ լինեն: Եթե համայնքի ընտրողների մեծամասնությունը համաձայն է, ապա նրանց ստորագրությունները հավաքեք եւ ուղարկեք: Կարիքը չկա դռների առաջը փակել»,- նոյեմբերի 26-ին Մարալիկում հայտարարել էր վարչապետը:
Նշենք, որ այսօր եւս բողոքի ակցիա է եղել՝ Արտակ Գեւորգյանի հրաժարականի պահանջով: «ՀԺ»-ի փոխանցմամբ՝ Նիկոլ Փաշինյանը համայնքապետի հրաժարականը պահանջողների հետ չի շփվել:
Նարեկ Կիրակոսյան
