Գագիկ Բեգլարյանի դատավոր փեսան ըննդեմ ՃՈ-ի վճիռ է կայացրել՝ արդարացնելով  վարորդին

Մոտ մեկ ամիս առաջ Վարչական դատարանը հետաքրքիր վճիռ է կայացրել ընդդեմ ոստիկանության՝ բավարարելով 146 կմ/ժ արագությամբ ավտոմեքենան վարած վարորդի հայցը: Դատական տեղեկատվական համակարգից Factor.am-ը տեղեկացավ, որ 2018 թվականի հունիսի 27-ին Mercedes-Benz մակնիշի C535BX799 համարանիշի ավտմեքենան, ըստ ոստիկանության, Դիլիջան քաղաքի Մ-4 91-րդ կմ-ում երթևեկել է 146 կմ/ժ արագությամբ: Ճանապարհային ոստիկանությունը վարորդ Արմեն Կարապետյանին տուգանել է 200 հազար դրամով: ՃՈ-ն որպես հիմք ներկայացրել է այն փաստը, որ քաղաքացին նշյալ հատվածում սահմանված 70  կմ/ժ արագությունը գերազանցել է 76 կմ/ժ-ով:

Նույն աղբյուրի փոխանցմամբ՝ հայցվոր կողմը կասկածի տակ է դրել Մ-4 91-րդ կմ-ում առկա արագաչափի ստուգաչափված լինելու փաստը եւ առաջարկել դատարանին վերացնել Ճանապարհային ոստիկանության սահմանած տուգանքը:

Դատական տեղեկատվական համակարգի փոխանցմամաբ՝ 2019 թվականի հուլիսի 4-ին, կայացվել է վճիռ հօգուտ հայցվոր կողմի: Դատարանի  վճռում ասվում  է, որ նշյալ արագաչափը, որը ֆիքսել է Mercedes-Benz մակնիշի C535BX799 համարանիշի ավտմեքենայի խախտումը փորձաքննության  է ենթարկվել 2015 թվականի սեպտեմբերի 15-ին: Դատարանը գտել է, որ երթևեկության սահմանված արագությունը 76կմ/ժ-ով գերազանցելու փաստը կասկած է հարուցում, հետևաբար` այդ պայմաններում չի հաստատվում հայցվորի կողմից իրավախախտում կատարելու փաստը:

Նշենք, որ վճիռը կայացրած դատավորը՝ Ռաֆիկ Խանդանյանը, տրանսպորտի եւ կապի նախկին նախարար Գագիկ Բեգլարյանի փեսան է:

Նարեկ Կիրակոսյան