Տնտեսություն
08.08.2019 | 12:36Հանրային ծառայությունները կարգավորող հանձնաժողովի նախագահ Գարեգին Բաղրամյանը Կառավարության այսօրվա նիստից հետո լրագրողների հետ զրույցում ասաց, որ բջջային կապի ոլորտում սակագների էական նվազումներ կլինեն և՛ Հայաստանում, և՛ Արցախում։ Նա խոսքով՝ մինչ այս սակագնի էժանացում չի եղել, քանի որ Հայաստանում գործող երեք օպերատորները և Արցախում գործող մեկ օպերատորը կամք չեն ցուցաբերել:
Գարեգին Բաղրամյանն ասաց, որ 2020-ի հունվարի 1-ից Արցախից ելքային զանգերը 38 դրամից կնվազեն մինչև 29 դրամ, որն էլ իր հերթին մինչև 2021 թվականի հունվար կնվազի՝ հասնելով 27 դրամի։ Մուտքային զանգերը 25 դրամից կնվազեն մինչև 15, այնուհետև՝ 13 դրամ։ Էական նվազեցումներ կլինեն ինտերնետի սակագների հարցում. գործող 45 դրամը հունվարի 1-ից կդառնա 22 դրամ։
«Մենք բանակցել ենք Արցախում կապի ոլորտում մենաշնորհ ունեցող ընկերության, Հայաստանի կապի օպերատորների հետ։ Արդյունքում՝ բացի այն, որ նվազելու են ռոումինգ ծառայության գները, այլև փոխկապակցման գներն են հաստատուն գրաֆիկով նվազելու՝ յուրաքանչյուր տարի մեկ դրամով։ Վերջնական նպատակն է՝ հասնել այն փոխկապակցման գնին, որոնք կան մեր օպերատորների միջև։ Կդառնա միասնական գին»,- ասաց ՀԿԾՀ նախագահը։
Հստակեցնող հարցին՝ ռոումինգն ընդհանրապես վերանալո՞ւ է, Բաղրամյանը պատասխանեց. «Հասնելու ենք նրան, որ լինի վերջնական միասնական գին»։ Նա տեղեկացրեց, որ առաջիկայում բանակցությունները շարունակվելու են, և հուշագրի ստորագրման ժամանակ հայտնի են լինելու այդ ամենին հասնելու ժամկետները։
Հիշեցնենք, որ բջջային կապի սակագներին ֆեյսբուքյան գրառմամբ անդրադարձել էր նաև վարչապետ Նիկոլ Փաշինյանը: Նա գրել էր, որ 2020 թվականի հունվարի 1-ից՝
– Դեպի Արցախ զանգերի սակագները կնվազեն շուրջ 25%-ով, այնուհետև նշված ժամանակահատվածում նվազումը կհասնի մինչև 30%,
– Արցախից զանգերինը՝ շուրջ 40%-ով, այնուհետև՝ մինչև 45%,
– տվյալների փոխանցման և ինտերնետ հասանելիության ծառայություններինը՝ շուրջ 50%-ով, այնուհետև՝ մինչև 65%,
– կարճ sms հաղորդագրություններինը՝ շուրջ 65%-ով, այնուհետև՝ մինչև 75%:
Մանրամասները՝ տեսանյութում:
Նարեկ Կիրակոսյան
