Դավիթ Սանասարյանի գործով նախաքննության ավարտի մասին պաշտպանական կողմը չի ծանուցվել

Օրերս Արցախում լրագրողների հետ ճեպազրույցում ԱԱԾ տնօրեն Արթուր Վանեցյանը հայտարարեց, որ ՊՎԾ լիազորությունները կասեցրած պետ Դավիթ Սանասարյանի գործով հայտարարվել է նախաքննության ավարտ։

Մինչդեռ Սանասարյանի պաշտպաններից Ինեսսա Պետրոսյանը Factor.am-ին հայտնեց, որ իրենք այս որոշման վերաբերյալ ծանուցում չեն ստացել․

«Մեզ դեռ պաշտոնապես չեն հայտարարել նախաքննության ավարտի մասին»,- ասաց նա։

Պաշտպանը նաև տեղեկացրեց, որ այս ընթացքում Դավիթ Սանասարյանը որևէ քննչական գործողության չի մասնակցել․ «Ըստ էության որևէ նախաքննական գործողություն պարոն Սանասարյանի մասնակցությամբ չի կատարվել։ ԱԱԾ տնօրենի հայտարարությունն այնքան էլ անսպասելի չէր, որովհետև վարույթն իրականացնող մարմինը, ի դեմս քննիչի, տեղեկություններ որոշակի տալիս էր, որ առաջիկայում կհայտարարվի նախաքննության ավարտ, բայց պարոն Վանեցյանն առաջ ընկավ և այդ մասին հայտարարեց լրագրողների հետ զրույցում»։

Պետրոսյանը ասաց՝ գործի նյութերին ծանոթանալուց հետո կորոշեն իրենց հետագա մարտավարությունը։

Հարցին, թե ինչ է կարծում, գործը դատարան կհասնի, պաշտպանն ասաց՝ ԱԱԾ-ի կողմից նման տրամադրություն կա, բայց դեռ պետք է սպասել դատախազի որոշմանը։

Նշենք, որ Արթուր Վանեցյանը Արցախում նաև հայտարարել էր, որ այս քրեական գործը կոծկելու տրամադրվածության մասին տեղեկությունները կեղծ են և չեն համապատասխանում իրականությանը։

Հիշեցնենք, որ Դավիթ Սանասարյանին մեղադրանք է առաջադրվել ՀՀ քրեական օրենսգրքի 308-րդ հոդվածի առաջին մասով՝ պաշտոնեական լիազորությունները չարաշահելու համար։ Նրա նկատմամբ որպես խափանման միջոց է ընտրվել ստորագրություն՝ չհեռանալու մասին, միաժամանակ քննիչի որոշմամբ ժամանակավորապես դադարեցվել են նրա պարտականությունների կատարումը։ Դավիթ Սանասարյանն իրեն առաջադրված մեղադրանքները չի ընդունում։

Լիլիթ Շաբոյան