19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Մարտի 1-ին Արցախից ժամանած ուժայիններին ղեկավարել է գերենալ-մայոր Օգանովսկին. BBC-ի ռուսական ծառայության անդրադարձը
Հասարակություն
07.08.2019 | 13:27
BBC-ի ռուսական ծառայությունն այսօր «Ո՞վ է 2008թ. Երևանում կրակել ցուցարարների վրա. քննությունը մատնացույց է անում Ղարաբաղից ջոկատի վրա» վերնագրով հրապարակում է արել, որում նշվում է, թե Մարտի 1-ի գործի նախաքննական նյութերին ծանոթանալու բացառիկ հնարավորություն է ունեցել:
Հրապարակման համաձայն՝ ցուցարարների ուղղությամբ կրակողներին ղեկավարել է գեներալ-մայոր Սամվել Կարապետյանը (Օգանովսկի), որը գործով որպես վկա է անցնում: Նախաքննական նյութերում նաև խոսվում է գործարար պատգամավորների՝ Գագիկ Ծառուկյանի և Սամվել Ալեքսանյանի մասին, որոնք կարող էին ֆինանսավորել Երևան բերված արցախցի ուժայիններին:
Ըստ հոդվածագրի՝ քննիչները կարծում են, որ ցուցարարների ուղղությամբ կրակ են բացել արցախյան ուժայինները, որոնց ղեկավարել է Կարապետյանը, իսկ ջոկատը տեղակայված է եղել նախագահականի նկուղում:
Գեներալ-մայոր Սամվել Կարապետյանը, որը հայտնի է նաև որպես Օգանովսկի, ծառայել է Արցախի Պաշտպանության բանակում: Հարցաքննությունների ժամանակ քննիչները պնդել են, որ հենց նա է ղեկավարել 2008 թվականին Երևան տեղափոխված արցախյան ստորաբաժանումները: Այս փաստը նա հաստատել է 2018թ. օգոստոսի 15-ի հարցաքննության ժամանակ, որին նա կանչվել է վկայի կարգավիճակով: Հարցաքննությունը 4 ժամ է տևել: Ի դեպ՝ որպես վկա հարցաքննվելիս Օգանովսկին զբաղեցրել է Արցախի պաշտպանության փոխնախարարի պաշտոնը, իսկ 2019-ի ապրիլին ազատվել է պաշտոնից:
Նախաքննության վարկածով՝ գեներալ Կարապետյանն իր ենթականերից 20 հոգանոց հատուկ խումբ է կազմավորել, որը տեղակայվել է Բաղրամյան պողոտայում գտնվող նախագահական նստավայրի նկուղում: Կարապետյանի հարցաքննությանը մասնակցած քննիչի պնդմամբ՝ այն ժամանակ նախագահ Ռոբերտ Քոչարյանն ու վարչապետ Սերժ Սարգսյանը մի քանի անգամ այցելել են խմբի անդամներին, որոնք պատրաստակամություն են հայտնել, հրամանի դեպքում, «կրակել ժողովրդի վրա», և հենց այդ խումբն է, նախաքննության պնդմամբ, մարտի 1-ին կրակել ցուցարարների ուղղությամբ:
Հարցաքննության ժամանակ գեներալ Կարապետյանը հերքել է բոլոր մեղադրանքները՝ հայտարարելով, որ «ժողովրդի վրա կրակելու հրաման ոչ ոք չի տվել»: Կարապետյանի հասցեին նման մեղադրանքներ հնչեցվել են նաև մի քանի այլ վկաների հարցաքննության ժամանակ, սակայն, ըստ հոդվածի, վերջինները չեն կարողացել հաստատել կամ հերքել Մարտի 1-ի ողբերգության մեջ գեներալի դերի մասին տեղեկությունը:
Ինչ վերաբերում է Գագիկ Ծառուկյանին և Սամվել Կարապետյանին, նախաքննության ընթացքում ՀՔԾ աշխատակիցները քննչական գործողությունների ժամանակ պնդել են, որ գործարար պատգամավորներն են վճարել 2008 թվականի փետրվար-մարտին Երևան տեղափոխված արցախցի զինվորականներին, ինչպես նաև ապահովել սննդով:
Քննիչը պնդել է, որ Գագիկ Ծառուկյանի ներկայացուցիչներն այցելել են նախագահականում Կարապետյանի հրամանատարությամբ գտնվող զինվորականներին և նրանց գումար բաժանել: BBC-ի հարցմանն ի պատասխան՝ երկու գործարարներն էլ հերքել են այս տեղեկությունը:
Նշենք, որ ՀՀ Հատուկ քննչական ծառայությունից չհաջողվեց պարզել, թե ինչպե՞ս են Մարտի 1-ի գործի նախաքննական նյութերը հայտնվել BBC-ի տրամադրության տակ: Մեզ պատասխանեցին, որ որևէ մեկնաբանություն չեն կարող տալ, քանի որ ՀՔԾ մամուլի խոսնակն այս պահին արձակուրդում է:
Հավելենք, որ Factor.am-ին տված հարցազրույցում փաստաբան Սեդա Սաֆարյանը նույնպես խոսել էր այն մասին, որ Արցախից ժամանած ուժայինները տեղակայված են եղել նախագահականում և նրանց գումար է բաժանվել: Փաստաբանը մեզ հետ զրույցում նույնպես մատնանշեց պատգամավորներ Գագիկ Ծառուկյանի և Սամվել Ալեքսանյանի անունները՝ հավելելով, որ գումար բաժանելուն մասնակից են եղել այլ գործարարներ ևս:
