14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Հայկ Մարությանը հանդիպել է Համահայկական խաղերում Երևանը ներկայացնող մարզիկների ու մարզիչների հետ
06.08.2019 | 20:45
Երևանի քաղաքապետ Հայկ Մարությանի գլխավորած պատվիրակությունը ժամանել է Ստեփանակերտ՝ մասնակցելու Արցախի Հանրապետության մայրաքաղաքում մեկնարկած Համահայկական յոթերորդ խաղերի բացման արարողությանը։
Ստեփանակերտի քաղաքապետ Սուրեն Գրիգորյանի հետ միասին Հայրենիքի համար կյանքը զոհած հերոսների հուշահամալիրում ծաղիկներ խոնարհելուց հետո քաղաքապետ Մարությանը հանդիպել է Համահայկական յոթերորդ խաղերում Երևանը ներկայացնող մարզիկների ու մարզիչների հետ։
Ողջունելով Երևանի հավաքականի անդամներին՝ քաղաքապետը հույս է հայտնել, որ Երևանի հավաքականը պատվով կներկայացնի համայն հայության մայրաքաղաքը խաղերում։ «Առողջ ապրելակերպը մեր ազգային նոր վերելքի քաղաքականության կարևոր բաղադրիչներից է։ Թեև Համահայկական խաղերն ավելի շատ համախմբման, իրար տեսնելու, իրար հետ շփվելու առիթ են, քան զուտ մարզական մրցություն, այնուհանդերձ, ես կարևորում եմ մարզական մրցակցության ոգին և հույս ունեմ, որ ինչպես նախորդ խաղերին, հիմա էլ դուք ամենաբարձր արդյունքները ցույց կտաք», – ասել է քաղաքապետը։
Հավաքականի անդամները քաղաքապետի հետ զրուցել են մայրաքաղաքի մարզամշակութային կյանքին ու քաղաքի զարգացման այլ ոլորտներին վերաբերող խնդիրների մասին։ Այնուհետև Ստեփանակերտի քաղաքապետարանում քաղաքապետ Մարությանը հանդիպել է իր գործընկեր Սուրեն Գրիգորյանին։ Զրուցակիցները փաստել են, որ Համահայկական խաղերի անցկացումը Արցախում լուրջ խթան կդառնա երկու մայրաքաղաքների հարաբերությունների զարգացման համար և ավելի ճանաչելի կդարձնի Արցախը սփյուռքի տարբեր համայնքներում ու, ընդհանրապես, հայկական աշխարհում։
Հայկ Մարությանը և Սուրեն Գրիգորյանը քննարկել են նաև համատեղ ծրագրերի ընթացքը։ 2019թ. օգոստոսի 5-18-ն Ստեփանակերտում կայանալիք Համահայկական ամառային 7-րդ խաղերի պաշտոնական բացումն ու մի շարք մարզաձևերի մրցաշարերը կընթանան Ստեփանակերտում, այնուհետև օգոստոսի 9-ից մրցումները կշարունակվեն Երևանում: Երևանի մարզական պատվիրակությունը, որն ամենամեծն է (285 մարզիկ), խաղերին կմասնակցի 19 հավաքական թիմով՝ 17 մարզաձևերում:
