19.12.2025 | 12:34
Քննիչի անբարեխիղճ վերաբերմունքի հետևանքով նախաքննական մարմինը զրկվել է ապացույցներ ձեռք բերելու հնարավորությունից․ ՀԿԿ
Սոչիի օդանավակայանը հերքում է հայազգի աշխատակիցներին ազատելու մասին լուրերը
Հասարակություն
02.08.2019 | 16:09
Սոչիի միջազգային օդանավակայանի աշխատակիցներին ազգային պատկանելության պատճառով զանգվածաբար աշխատանքից ազատելու մասին լուրերը չեն համապատասխանում իրականությանը և վիրավորական են ընկերության համար: Այս մասին գրում է ՏԱՍՍ-ը՝ վկայակոչելով օդանավակայանի մամուլի ծառայությունը:
Աղբյուրի փոխանցմամբ՝ չորեքշաբթի մի շարք լրատվամիջոցներում և սոցցանցերում հայտնվել են Սոչիի միջազգային օդանավակայանի աշխատակիցների ուղերձները, որոնք հայտնել են, թե ընկերությունն արդեն երկրորդ տարին է՝ ազգային պատկանելության պատճառով աշխատանքից ազատում է աշխատակիցներին: Հայտարարությունում նշվում է, որ այս խնդիրը վերաբերում է օդանավակայանի 200 աշխատակիցների, որոնից շուրջ 100-ն արդեն ազատվել է:
«Լրատվամիջոցներում հակասական և ընկերության համար վիրավորական տեղեկատվության ի հայտ գալու հետ կապված՝ Սոչիի միջազգային օդանավակայանը պաշտոնապես հայտարարում է, որ ընկերության կադրային քաղաքականությունը համապատասխանում է ՌԴ օրենսդրության բոլոր նորմերին և պահանջներին:
Օդանավակայանի աշխատակազմը բազմազգ է, և մենք դա համարում ենք մեր առավելությունը, կադրային որոշումները կայացվում են՝ հիմնվելով կորպորատիվ ստանդարտների և դրույթների, էթիկական նորմերի վրա, որոնք գոյություն ունեն բազմազգ թիմում: Սակայն աշխատակիցների մի փոքր խումբ, որոնք վերջերս խզել են աշխատանքային հարաբերություններն օդանավակայանի հետ, դիտավորյալ օգտագործում են ազգային դրդապատճառը՝ իրենց անձնական շահերի համար՝ հատուկ պայմաններ պահանջելով իրենց համար: Մենք կարծում ենք, որ այդ անձանց խմբի գործողությունները ոչ միայն իրավաչափ չեն, այլև հանգեցնում են ազգամիջյան ատելության հրահրման, ինչն անթույլատրելի է»,- հայտնել են օդանավակայանի մամուլի ծառայությունից:
Նշենք, որ Սոչիի միջազգային օդանավակայանի մի խումբ հայազգի աշխատակիցներ հաղորդագրություն են տարածել, որ օդանավակայանի ղեկավարությունը 2018 թվականից սկսած՝ աշխատանքից ազատում է հայկական ազգանունով աշխատակիցներին: Նրանց պնդմամբ՝ արդեն աշխատանքից ազատվել է 100 աշխատակից, ևս 100-ն իր հերթին է սպասում:
