«Ֆերմերն ահազանգում է, իսկ ՍԱՏՄ-ից դեսանտ է իջնում և հորդորում չասել՝ ինչ հիվանդությունից է սատկել կենդանին»․ Գրիգոր Գրիգորյան

Հայաստանում սանիտարա-համաճարակային և անասնահամաճարակային իրավիճակը պայթյունավտանգ է, սակայն պատկան մարմինները որևէ բան չեն ձեռնարկում և ավելին՝ փորձում են այն թաքցնել։ Այս մասին այսօր հրավիրված մամուլի ասուլիսի ժամանակ ասաց Սննդամթերքի անվտանգության տեսչական մարմնի նախկին ղեկավար Գրիգոր Գրիգորյանը։

«Այս մամուլի ակումբում ֆերմերը հնչեցրեց խնդիր և ահազանգեց բրուցելյոզի մասին։ Բոլորը սրա մասին գիտեն, որ բրուցելյոզի վարակվածության ստույգ աստիճանը դեռ պարզված չէ, բայց չէ՞ որ այդ խնդիրը կա ամբողջ երկրով։ Խնդիրը կա, բայց հստակ տվյալ ՍԱՏՄ-ն չունի։ Ինձ համար անհասկանալի է այդ ֆերմերի ահազանգի հետ կապված ՍԱՏՄ-ի տարածած հաղորդագրությունը, որտեղ մանիպուլյատիվ խաղ է գնում ընդամենը։ ՍԱՏՄ-ն ժխտում է ֆերմերի ահազանգը, բայց այն առկա է և՛ Վայոց ձորում,  և՛ բոլոր մարզերում»,- ասաց  Գևորգյանը։

Վերջինս նաև նշեց, որ ինքն անձամբ իրականացրել է մոնիթորինգ և, ըստ իր ունեցած ուսումնասիրության, Հայաստանի մի շարք մարզերում աֆրիկյան ժանտախտն է վխտում։

«Լոռու և Տավուշի մարզերում վխտում է աֆրիկական ժանտախտը, բայց իրենց աշխատակիցները գնում և ասում են՝ հանկարծ չասեք, թե ինչ հիվանդությունից է սատկել կենդանին, այսինքն, երբ ֆերմերներն ահազանգում են, որ կենդանին անկել է, այդ ժամանակ ՍԱՏՄ-ից դեսանտ է իջնում և նրանց հորդորում ասել, որ կենդանին սատկել է անհայտ հիվանդությունից։ Վերջին շրջանում Գյումրիում էլ, օրինակ, կենդանիների անկում գրանցվեց պատվաստում չանցնելու պատճառով, իսկ այս ամենը վկայում է, որ մենք գործ ունենք ոչ պատշաճ աշխատանքի և դեպքերը կոծկելու հետ»,- ասաց Գևորգյանը։

Հիշեցնենք, որ օրեր առաջ՝ հուլիսի 22-ին, ֆերմեր Տիգրան Եղոյանը հայտնել էր, որ մի քանի ամիս է՝ Վայոձ ձորում սարսափելի իրավիճակ է տիրում․ մարզի Քարագլուխ, Շատին և մի քանի այլ գյուղերում բրուցելյոզ հիվանդությամբ տառապած կենդանիների միսը տանում վաճառում են, իսկ Մարտունու շրջանում հիվանդ կենդանիներին վաճառում են, որտեղից գնված միսը տեղափոխում են Երևան։

Այս ահազանգից միայն 3 օր անց՝ հուլիսի 25-ին, ՍԱՏՄ-ն տարածեց հայտարարություն՝ նշելով, որ ֆերմերն ապատեղեկատվություն է տարածել։

Աղավնի Սուքիասյան