27.06.2026 | 16:59
Մեզ մոտենում են արևադարձային տաք օդային հոսանքներ, ջերմաստիճանը կհասնի 35-36 աստիճանի․ Սուրենյան
Հրայր Թովմասյանի հետ կապված իրավապահները որևէ ուսումնասիրություն չեն իրականացնում․ կառույցներից արձագանքում են
Հասարակություն
26.07.2019 | 13:37
Իրավապահ մարմինների խոսնակները միաձայն պնդում են՝ Սահմանադրական դատարանի նախագահ Հրայր Թովմասյանին առնչվող որևէ գործողություն իրենց կառույցներում չի իրականացվում։
Մամուլը վերջին օրերին, հղում անելով իր աղբյուրներին, գրում է, որ իրավապահները ուսումնասիրություններ են սկսել Ազգային ժողովում և արդարադատության նախարար աշխատած տարիներին Հրայր Թովմասյանի թույլ տված հնարավոր չարաշահումների և ենթադրյալ ապօրինի սեփականաշնորհման գործարքների հետ կապված։
Factor.am-ը հարցի առնչությամբ փորձեց պարզաբանումներ ստանալ իրավապահ մարմինների խոսնակներից, նախ դիմեցինք Գլխավոր դատախազության, Հատուկ քննչական ծառայության և Ազգային անվտանգության ծառայության մամուլի խոսնակներին, երեք մարմիններն էլ հերքեցին այս լուրերը՝ պնդելով, որ Թովմասյանի հետ կապված որևէ գործողություն չի իրականացվում։
Թեև պաշտոնյաներին առնչվող գործերը քննում են այս կառույցները, բայց այնուամենայնիվ դիմեցինք նաև Քննչական կոմիտե և Ոստիկանություն, սակայն պատասխանը կրկին բացասական էր։ Ստացվում է, որ ՍԴ գործող նախագահ Հրայր Թովմասյանի հետ կապված իրավապահները որևէ ուսումնասիրություն չեն իրականացնում։
Հիշեցնենք՝ Սահմանադրական դատարանի նախագահի շուրջ ստեղծված իրավիճակը դեռևս հանգուցալուծման չի հասել։ Իշխանության տարբեր ներկայացուցիչներ պնդում են՝ նա պետք է հրաժարական տա, իսկ Թովմասյանը հրաժարական տալու մտադրություն չունի։
Շողիկ Գալստյան
