14.12.2024 | 11:33
Արտարժույթների փոխարժեքները՝ դեկտեմբերի 14-ի դրությամբ
«Հայրենիքի պաշտպան» ծրագրին մասնակցած զինհաշմանդամը աշխատանքի է ընդունվել «Երևան իմ սեր» հիմնադրամում
Հասարակություն
24.07.2019 | 10:38
«Երևան իմ սեր» հիմնադրամից տեղեկացնում են, որ 21-ամյա Տիգրան Սարգսյանը մասնակցել է «Հայրենիքի պաշտպան» ծրագրին, որի մասին ՀՀ նախագահ Արմեն Սարգսյանը հայտարարել էր 2019թ.-ի հունվարի 28-ին: Այն իրականացնում է «Երևան իմ սեր» հիմնադրամը: Նպատակն է աջակցել ծառայության ընթացքում վիրավորված, հիվանդություններ ստացած զինծառայողներին՝ նրանց ուսուցանել նոր հմտություններ և ընձեռել աշխատանք ունենալու հնարավորություն:
««2017թ-ին Արցախում՝ Թալիշում, ծառայության ընթացքում տեղի ունեցած դժբախտ պատահարի հետևանքով կորցրեցի ձախ ձեռքիս թաթի հիմնական հատվածը: Հետո այդ ձեռքս անշարժացավ»,-ասել է Տիգրանը: Հայրենիքի պաշտպանի վերականգնողական կենտրոնում բուժվելուն զուգահեռ, այս տարվա մարտից նա մասնակցել է «Հայրենիքի պաշտպան» ծրագրի առաջին փուլին: Եռամսյա դասընթացի ընթացքում սովորել է լուսանկարչություն, օպերատորություն ու համակարգչային մոնտաժ: «Երևան իմ սեր» հիմնադրամի տնօրեն Արշակ Կարապետյանի որոշմամբ, Տիգրան Սարգսյանը որպես լուսանկարիչ աշխատանքի է ընդունվել «Երևան իմ սեր» հիմնադրամում: Հետագայում մասնակցելու է նաև զինհաշմանդամների համար իրականացվող ծրագրերին: «Երևան իմ սեր» հիմնադրամը «Հայրենիքի պաշտպան» ծրագրի առաջին փուլի արդյունքներն ամփոփելու և ծրագրի հետագա ընթացքի մասին մանրամասներ է ներկայացնելու աշնանը, քանի որ ծրագրին մասնակցած տղաների մի մասը բնակվում են մարզերում և այս պահին Երևանում չեն»,- ասված է հաղորդագրությունում:
