Ինչպե՞ս է ստացվել, որ մի ընկերություն, որը լավ կամ վատ կատարում էր իր աշխատանքը, հիմա չի կարողանում նույնն անել․ Արման Ղուկասյան

«Հանուն սոցիալական արդարության» կուսակցության ներկայացուցիչներն այսօր առավոտյան բողոք-նամակ փոխանցեցին Երևանի քաղաքապետին՝ մայրաքաղաքում աղբահանության շուրջ ստեղծված իրավիճակի մասին:

Կուսակցության նախագահ Արման Ղուկասյանը լրագրողների հետ զրույցում նշեց, որ աղբահանության խնդիրը Երևանում երբեք այսքան սուր չի եղել, որքան հիմա է, ուստի աղբահանություն իրականացնող ընկերությունը, ըստ նրա, պետք է փոխվի։

«Մեզ համար կան շատ անհասկանալի հարցեր․ «Սանիթեք» ընկերությունը մեղադրում է քաղաքապետարանին, իսկ քաղաքապետարանն ամբողջ մեղքը բարդում է այդ ընկերության վրա։ Պարզ չէ, թե ինչպես է ստացվել, որ մի ընկերություն, որը լավ կամ վատ կատարում էր իր աշխատանքը, հիմա չի կարողանում նույնն անել»,- ասաց  Ղուկասյանը։

Վերջինիս խոսքով՝ Երևան քաղաքի բնակիչներին չի չհետաքրքրում այն հարցը, թե ինչ պատժամիջոցների և տուգանքների է ենթարկվում աղբահանող ընկերութունը, որովհետև յուրաքանչյուր ամիս Երևանի բնակիչները գումար են վճարում աղբահանության ծառայությունների դիմաց, սակայն փոխարենը  պատշաճ ծառայություն չի մատուցվում:

Կուսակցության նախագահ Արման Ղուկասյանը Երևանի քաղաքապետ Հայկ Մարությանին հիշեցրեց նաև նրա տված նախընտրական խոստումները։

«Ձեր նախընտրական քարոզարշավի շրջանակներում Դուք խոստացել էիք Երևանի բնակիչներին, որ մայրաքաղաքում կհայտնվեն աղբահանության նոր օպերատորներ: Սակայն այս ուղղությամբ դեռևս առաջընթաց չկա: Չե՞ք կարծում արդյոք, որ իր պարտականությունները չկատարող ընկերությունը պետք է փոխարինվի»,- ասաց  նա։

Աղավնի Սուքիասյան