15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
Գյումրիում կաշառք վերցնելիս ձերբակալվել է սոցիալական ապահովության բաժնի տեսուչը
Հասարակություն
23.07.2019 | 14:39
ՀՀ ոստիկանության տարածած հաղորդագրության համաձայն կոռուպցիոն բնույթի հանցագործության համար ձերբակալվել է «Գյումրի 2» տարածքային բաժնի տեսուչներից մեկը։ ՀՀ ոստիկանության կազմակերպած հանցավորության դեմ պայքարի գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչության, Շիրակի մարզային վարչության և Մուշի բաժնի ծառայողները համատեղ օպերատիվ-հետախուզական միջոցառումների արդյունքում կոռուպցիոն բնույթի հանցագործության վերաբերյալ օպերատիվ տվյալներ են ստացել։
Ըստ տեղեկությունների՝ Շիրակի մարզպետարանի սոցիալական ապահովության «Գյումրի 2» տարածքային բաժնի տեսուչներից մեկը մի կնոջ նպաստառուների ցուցակում ընդգրկելու, իսկ հետագայում նպաստից չզրկելու համար 2017-2018 թվականների ընթացքում պահանջել ու ստացել է ընդհանուր 63.000 դրամ կաշառք։ Նույն կնոջը 2019 թվականի նպաստառուների ցուցակում ընդգրկելու համար էլ տեսուչը պահանջել է երկու ամսվա նպաստի գումարը’ ընդհանուր 56.000 դրամ։ Հուլիսի 22-ին պահանջած կաշառքը վերցնելու պահին ոստիկանության ծառայողները ձերբակալել են նրան։
Factor.am-ի հետ զրույցում Շիրակի մարզի դատախազ Կարեն Գաբրիելյանը նշեց, որ ձերբակալվածը կին է։ Նա ձերբակալվել է այսօր։
«Ձերբակալվել է Գյումրու սոցիալական ծառայության աշխատակիցը, այս պահին կատարվում են անհրաժեշտ քննչական ու դատավարական գործողությունները։ Նշված անձը ձերբակալվել է ՀՀ քրեական օրենսգրքի 311 Բ 1 հոդվածի 3-րդ մասի 3-րդ կետով նախատեսված ենթադրյալ հանցանք կատարելու կասկածանքով։ Ձերբակալվել է ապօրինի վարձատրություն ստանալու կասկածանքով»,- ասաց Կարեն Գաբրելյանը։ Կատարվում է քննություն։
Էմմա Չոբանյան
